Իրանը միջուկային զենք ստեղծելու կամ ձեռք բերելու նպատակ չունի, Իրանը չի ձգտում միջուկային զենք ձեռք բերելուն, այսօր՝ հունիսի 17-ին, ԻԻՀ դեսպանատանը հրավիրված մամուլի ասուլիսի ընթացքում Euromedia24-ի հարցին ի պատասխան պարզաբանեց Հայաստանում Իրանի Իսլամական Հանրապետության արտակարգ և լիազոր դեսպան Մեհդի Սոբհանին՝ մեկնաբանելով այն չհաստատված տեղեկությունները, որ Իրանը կարող է միջուկային զենքի փորձարկում իրականացնել Իսրայելի դեմ:
«Դուք շատ լավ գիտեք, որ հանցագործ Նեթանյահուն հայտարարեց, որ իրենք դրա համար են հարձակվում Իրանի վրա, քանի որ Իրանը ձգտում է միջուկային զենք ստեղծել: Նրանք փորձում են այդ լուրերը շրջանառության մեջ դնելով՝ արդարացնել իրենց գործողությունները։ 100 տոկոսով դա սուտ է», - հայտարարեց դեսպանը:
Դիվանագետի խոսքով՝ այդ կերպ Իսրայելը փորձում է հող նախապաստել Միացյալ Նահանգներին Իրանի դեմ պատերազմի մեջ ներքաշելու և Իրանի դեմ կոալիցիա ձևավորելու համար:
«Նեթանյահուն բազմիցս մոլորեցրել է և այժմ էլ փորձում է մոլորեցնել Թրամփին», - հավելեց դեսպանը:
Մեհդի Սոբհանին Իսրայելի վարչապետին անվանեց «պատերազմական հանցագործ», որը հետապնդվում է միջազգային ատյանների կողմից: Դեսպանի խոսքով՝ Նեթանյահուն փորձում է մոլորեցնել Միացյալ Նահանգներին, Եվրոպային և ողջ միջազգային հանրությանը` համոզելով, թե իբր Իրանն ուզում է միջուկային զենք ստեղծել, մինչդեռ դա չի համապատասխանում իրականությանը:
«Ինչո՞ւ են նրանք հիմա ցանկանում քաղաքական գին վճարել մի հանցագործի համար, որը հետապնդվում է միջազգային ատյանների կողմից», - հավելեց Իրանի դեսպանը:
Ավելի վաղ Իրանի դեսպանը ասուլիսում ներկայացրել էր հունիսի 13-ին Իսրայելի Պետության, իր ձևակերպմամբ՝ «սիոնիստական ռեժիմի» կողմից Իրանի դեմ ապօրինի զինված հարձակման հետևանքները՝ նշելով, որ պատերազմը Իսրայելի համար ոչ թե գործիք է, այլ նպատակ:
