Իրանը Թեհրանի միջուկային ծրագրի շուրջ տարաձայնությունները լուծելու համար Միացյալ Նահանգների հետ բանակցությունների վեցերորդ փուլի ամսաթիվը և վայրը կհայտարարի համապատասխան ժամանակին, հայտարարել է Իսլամական Հանրապետության արտաքին գործերի նախարարության պաշտոնական ներկայացուցիչ Էսմայիլ Բաղային։
«Այս պահին ես լրագրողների համար որևէ տեղեկություն չունեմ բանակցությունների վեցերորդ փուլի մասին։ Եթե որոշում կայացվի, այն կհայտարարվի ավելի ուշ», - ասել է դիվանագետը ճեպազրույցի ժամանակ։
Նրա խոսքով՝ «ցանկացած ծրագիր, որը հաշվի չի առնում Իրանի ժողովրդի շահերն ու իրավունքները՝ թե՛ խաղաղ միջուկային էներգիայի ոլորտում, այդ թվում՝ ուրանի հարստացման, թե՛ անօրինական պատժամիջոցների վերացման առումով, անընդունելի է»։
«Մենք մեր սեփական նախաձեռնությունը Օմանի միջոցով կփոխանցենք հակառակ կողմին անմիջապես՝ դրա ավարտից հետո։ Անկասկած, Միացյալ Նահանգների շահերից է բխում լրջորեն քննարկել այս առաջարկը», - հավելել է նա։
