ՆԳՆ փրկարար ծառայության մարզային փրկարարական վարչությունների ենթակա ստորաբաժանումների կողմից մայիս ամսվա ընթացքում հանրապետության բոլոր մարզերում կազմակերպվել և անց են կացվել մի շարք դասընթացներ և ուսումնավարժանքներ, որոնց նպատակն էր բարձրացնել բնակչության իրազեկվածությունն ու գործնական հմտությունները՝ արտակարգ իրավիճակներում անվտանգ և համակարգված գործելու համար:
Մի շարք շտաբային ուսումնավարժություններ են անցկացվել, որոնք վերաբերել են ՔՊ միջոցառումների կազմակերպմանն ու իրականացմանը ՔՊ համակարգը խաղաղից ռազմական դրության փոխադրման ժամանակ, բնակչության պաշտպանության միջոցառումների կազմակերպմանն ու իրականացմանը ՀԱԷԿ-ի միջուկային և (կամ) ճառագայթային վթարների, ջրածածկման սպառնալիքի, համաճարակի հանգեցնող վարակիչ հիվանդության, ուժեղ երկրաշարժի, ուժեղ քամիների, սողանքի առաջացման, ջրամբարի պատվարի փլուզման սպառնալիքի դեպքում:
Անցկացվել են «Բնակչության պաշտպանության միջոցառումների իրականացումն ուժեղ երկրաշարժի դեպքում» թեմայով հրամանատարաշտաբային և «Հիվանդների պաշտպանության միջոցառումների կազմակերպումը հրդեհի դեպքում» թեմայով օբյեկտային ուսումնավարժանքներ:
Միևնույն ժամանակ ուշադրության կենտրոնում պահելով հրդեհային անվտանգության հետևողական վերահսկողությունն ու պատասխանատու մոտեցումը՝ անցկացվել են ցուցադրական և հատուկ տակտիկական ուսումնավարժություններ, որոնք վերաբերել են հրդեհաշիջման և տարհանման աշխատանքների կազմակերպմանն ու իրականացմանը տարբեր հաստատություններում բռնկված հրդեհի, գազի պայթյունի, ստորգետնյա գազատարից արտահոսքի, երկրաշարժի հետևանքով առաջացած հրդեհի դեպքում, ինչպես նաև առաջին օգնության ցուցաբերման, փլատակներից տուժածների դուրսբերման աշխատանքներին: Վարժանքներ են կազմակերպվել և անցկացվել «Քարաթափման հետևանքով անանցանելի դարձած ճանապարհահատվածի մաքրման աշխատանքների իրականացում», «Օդային տագնապ» ազդանշանի դեպքում բնակչության ազդարարման, պատսպարման և տարհանման աշխատանքների իրականացումը» թեմաներով:
Մարզերի մի շարք ուսումնական հաստատություններում, կազմակերպություններում իրականացվել են տարբեր թեմաներին վերաբերող տեսական և գործնական միջոցառումներ՝ մասնավորապես «Հեղեղումների ժամանակ և հեղեղումներից հետո վարքականոնները» և «Ազդարարման ազդանշանները», ինչպես նաև «Դաշտերը և այգիների խոտի այրման վնասները և դրա կանխարգելման կարևորությունը» թեմաներով դասընթացներ՝ ուղղված բնակչության իրազեկվածության և պատրաստվածության բարձրացմանը՝ բնական և տեխնածին աղետների, ինչպես նաև բնապահպանական վտանգների կանխարգելման ու հաղթահարման ուղղությամբ, միևնույն ժամանակ նպատակ ունենալով մասնակիցների շրջանում ձևավորել տարանջատված և ճիշտ վարքագիծ՝ հեղեղումների ժամանակ, ընթացքում և հետո` նպաստելով վերջիններիս պատրաստվածության բարձրացմանը:
Կարևորելով արտակարգ իրավիճակների պայմաններում պատշաճ գործողությունների վերաբերյալ գիտելիքների և հմտությունների զարգացումը, դասընթացների շրջանակներում ներառվել են նաև հետևյալ թեմաները. «Բնակչության տարհանման, պատսպարման կազմակերպումը և իրականացումը», «Երկաթուղային տրանսպորտի վթարների ժամանակ որոնողափրկարարական աշխատանքների առանձնահատկությունները», «Հրդեհային անվտանգության հիմունքները», «Ազդարարում, տարհանում, պատսպարում», «Ջրհեղեղ և ազդարարում», «Ջրհեղեղ և երկրաշարժ», «Արտակարգ իրավիճակների ժամանակ ճիշտ կողմնորոշում»։
Ամսվա ընթացքում տեղի են ունեցել նաև ԱՌԿ պլանների վերաբերյալ սեմինար-պարապմունքներ՝ քաղաքացիական պաշտպանության համակարգի արդյունավետությունն ու պատրաստվածությունը բարձրացնելու, ինչպես նաև արտակարգ իրավիճակների կանխարգելման և դրանց արձագանքման գործողությունների պլանավորման գործընթացը կատարելագործելու նպատակով:
Մարզային փրկարարական վարչությունների ենթակա ստորաբաժանումների կողմից իրականացվել են հանրային իրազեկման աշխատանքներ՝ ուղղված անտառներում և բուսածածկ տարածքներում հնարավոր հրդեհների կանխարգելմանը, հրդեհների դեմ պայքարին, դրանց տարածմանը: Մարդաշատ վայրերում հրդեհային անվտանգության կանոնների պահպանման վերաբերյալ տարածվել են իրազեկման թերթիկներ և փակցվել պաստառներ:
