Գերտերություններին նոր պատերազմ պետք չէ Հայաստանի և Ադրբեջանի միջև, պատերազմը ձեռնտու է թուրք-ադրբեջանական տանդեմին, որը, զգալով տարածաշրջանում ստեղծված «աշխարհաքաղաքական վակումը», փորձում է հասնել մարտավարական հաջողությունների: Այս մասին Euromedia24-ի հետ հարցազրույցում նշեց ԵՊՀ Միջազգային հարաբերությունների ֆակուլտետի Քաղաքական ինստիտուտների և գործընթացների ամբիոնի վարիչ քաղաքագիտության դոկտոր, պրոֆեսոր Գարիկ Քեռյանի հետ՝ խոսելով Հայաստանի և Ադրբեջանի միջև խաղաղության հաստատման հեռանկարների և Ադրբեջանի կողմից նոր պատերազմի սանձազերծման վտանգի մասին:
Այս հարցում քաղաքագետը կարևոր նշանակություն է տալիս միջազգային ընդհանուր միջավայրին և ազդեցիկ խաղացողների դերակատարությանը՝ փաստելով, որ Հարավային Կովկասում որոշակի «աշխարհաքաղաքական վակում» է առաջացել, որից փորձում են օգտվել Թուրքիան և Ադրբեջանը:
Խոսելով նոր աշխարհում տեղի ունեցող փոփոխությունների մասին՝ պրոֆեսոր Գարիկ Քեռյանը կանխատեսում է, որ ներկա աշխարհաքաղաքական գործընթացների արդյունքում ձևավորվելու է եռակենտրոն աշխարհակարգ՝ ի դեմս ԱՄՆ-ի, Ռուսաստանի և Չինաստանի: Նաև լինելու են ուժային ենթահամակարգեր, որտեղ առանցքային դերակատարում են ունենալու Հնդկաստանը, Բրազիլիան, Թուրքիան, Իրանը, Ճապոնիան և Եվրամիությունը:
«Կլինի եռակենտրոն աշխարհակարգ՝ ուժային ենթահամակարգերով, և սա արդեն քանի գնում՝ ավելի շատ է ուրվագծվում: Եվ ինչպես Յալթա-Պոտսդամյան համակարգում տեղի ունեցավ գլոբալ ազդեցության գոտիների բաժանում Արևելք և Արևմուտք բևեռների՝ ԽՍՀՄ-ի և Միացյալ Նահանգների միջև, այնպես էլ առայժմ Ռուսաստանը, Միացյալ Նահանգները և Չինաստանը, հնարավոր է, գան նմանատիպ մի գլոբալ համաձայնության, որտեղ արդեն կտեղավորվեն ավելի քիչ համաշխարհային նկրտումներ ունեցող կենտրոնները», - կանխատեսեց մասնագետը:
Գարիկ Քեռյանի համոզմամբ՝ նաև Ռուսաստանը վերականգնելու է իր ազդեցությունը Հարավային Կովկասում և վերադառնալու է տարածաշրջան:
Ըստ նրա՝ Հայաստանը կարող է խուսափել նոր պատերազմից և պահպանել իր գոյությունը, եթե գտնի համակեցության կանոններ հարևանների հետ և չտարվի սին պատրանքներով, որոնցով հայ ժողովուրդն ապրել է վերջին 300 տարիներին և միշտ տուժել է՝ կորցնելով մեծ տարածքներ: Քաղաքագետի համոզմամբ՝ Հայաստանը պետք է հարցերի լուծումը փնտրի տարածաշրջանում, ոչ թե հայացքն ուղղի դեպի Արևմուտք:
Հարցազրույցն ամբողջությամբ՝ տեսանյութում:
Արամ Սարգսյան
