Հունգարիան դեմ է ԵՄ-ին Ուկրաինայի արագացված անդամակցությանը, քանի որ դա նոր «արևելյան ճակատ» կբացի, ասել է Հունգարիայի վարչապետ Վիկտոր Օրբանը։
«Մեզ պետք չէ նոր արևելյան ճակատ, ուստի մեզ պետք չէ Ուկրաինայի անդամակցությունը Եվրամիությանը», - ասել է Օրբանը Բուդապեշտում Պահպանողական քաղաքական գործողությունների համաժողովում (CPAC):
Նա մանրամասնել է, որ Հունգարիան ունի իր «հայրենասիրական ծրագիրը» Եվրամիության վերակազմավորման համար՝ ի տարբերություն ազատականի, որը ենթադրում է ռազմական ծախսերի ավելացում և անդամ երկրների վերահսկողության ուժեղացում Բրյուսելից։
«Մենք ինքնիշխանություն ենք ուզում, մենք չենք ուզում ընդհանուր հարկեր, չենք ուզում ընդհանուր փոխառություններ, չենք ուզում տնտեսության կենտրոնացված կառավարում և չենք ուզում, որ մեր փողերը գնան երրորդ երկրի պատերազմին»,- ընդգծել է Օրբանը։
Հունգարիայի կառավարությունը և եվրոպական պահպանողական մյուս առաջնորդները նույնպես կցանկանային պաշտպանել Եվրոպան անօրինական միգրացիայից, ամրապնդել հանրային անվտանգությունը և ավանդական քրիստոնեական արժեքները, հավելել է նա։
Հունգարիայի վարչապետը նշել է, որ ծրագրի իրականացման համար պահանջվում է պահպանողական քաղաքական գործիչների հաղթանակ համապետական ընտրություններում, որին հաջորդում է «հաղթական ճակատամարտը Բրյուսելում»։
