Պատանի հանդիսատեսի թատրոնում մայիսի 14-ից սկսած գործադուլը պարալիզացրել է Թատրոնի ու դերասանակազմի օրակարգը, թատրոնն անգամ վարչական գործառույթներում է դադար առել երկու շաբաթ՝ տնօրենին վաղաժամ հեռացնելու քաղաքապետի անհասկանալի որոշման պատճառով։ Ընդգծենք, որ Գոռ Մարգարյանը մայիսի 13-ից՝ իր նշանակման օրվանից ոտք չի դրել թատրոն և չի հանդիպել իրեն գործադուլով դիմավորող դերասաններին։ Ավելին, Երևանի քաղաքապետի մամուլի խոսնակ Հայկ Կոստանյանն իր ֆեյսբուքյան էջում է հայտնել ՊՀԹ ժ/պ-ի նշանակման մասին դեռևս 10 օր առաջ։
Էմին Թորոսյանը երկրորդ 5-ամյա պաշտոնավարման ցիկլն էր սկսել անցած տարի՝ տնօրենի թափուր տեղի մրցույթը փայլուն կերպով հաղթահարելուց հետո։ Տնօրենի պաշտոնանկության դեմ ընդվզող 100-ից ավելի դերասանական կազմը չի ընդունում և չի հավատում «հրավիրատոմսերի բաշխման» պատճառաբանությամբ Թորոսյանին ազատելու հիմնավորումը։ Եւ խիստ ուշահգրավ է, որ X ժամկետի համար 1200 հրավիրատոմսերի նյութական վնաս հաշված Երևանի քաղաքապետարանը աչք է փակում մի ամբողջ մայիս ամիսը տապալած թատրոնի գործունեության փաստի վրա, ի վերջո թատերակազմն ընդվզել է ու հրաժարվում է հաստատված խաղացանկով բեմ բարձրանալ։
Ի դեպ, շատերը հասցրել էին տոմսեր գնել այս ընթացքում, բայց անիմաստ է դարձել, քանի որ անորոշ ժամկետով բողոքի արշավ է սկսել ՊՀԹ-ն և այս օրերին անգամ տապալվեց՝ Րաֆֆու «Խենթը» հերթական ներկայացումը։ Թատրոնից հանդիսատեսին տեղեկացրել են, որ չգիտեն երբ կվերսկսեն բնականոն գործունեությունը, ուստի առաջարկում են տոմսերի վերադարձ։ Իսկ ի՞նչ ծավալի ֆինասնական կորուստներ կրեց թատրոնն այս օրերին, և արդյո՞ք այդ մեծ վնասը չի գերազանցել քաղաքապետ Տիգրան Ավինյանի որոշմանն իբր հիմք դարձած 1200 հրավիրատոմսերի արժեքին․․․ ի վերջո հանդիսատեսը շուրջ 15 օր է՝ զրկված է սիրելի թատրոնի ներկայացումները վայելելու հաճույքից, որտեղ տոմսերն արժեն 1000-ից 3000 դրամ, իսկ դահլիճն ամբողջությամբ հաշվվում է 370 նստաեղ, որից վաճառքի են հանվում 352-ը։
Euromedia24-ը կապ է հաստատել Երևանի քաղաքապետարանի մամուլի խոսնակ Հայկ Կոստանյանի հետ՝ պարզելու՝ որքա՞ն ֆինանսական վնասներ է կրել թատրոնը, ինչո՞ւ գործադուլ անող դերասանների հետ թատրոնի ժամանակավոր պաշտոնակատարը չի հանդիպել այս ժամանակահատվածում և ինչո՞ւ է իր հրապարակման ու ժ/պ-ի նշանակման միջև տարբերությունն այսքան։ Ի պատասխան Հայկ Կոստանյանն ասաց. «Նորանշանակ տնօրենն առողջական որոշակի խնդիրներ է ունեցել, դրանով պայմանավորված նշանակումից հետո դեռ չի գնացել թատրոն։ Առաջիկայում արդեն տնօրենին կներկայացնեն, տնօրենը կներկայացնի իր ծրագիրը և ամեն բնականոն հունով կանցնի աշխատանքի»։ Ինչը վերաբերում է թատրոնի կրած ֆինանստական վնասներին, Կոստանյանն ասաց, որ կդժվարանա որևէ հստակ բան ասել, իսկ ինչը վերաբերում է մայիսի 13-ին կատարած իր հրապարակմանը՝ Կոստանյանը եզրափակելով զրույցն ասաց. «Ես հստակ որևիցե օր չեմ ասել, ես ընդհանուր իրավիճակից ելնելով ասել եմ, որ նոր մարդ է նշանակվելու, իր ծրագիրն է ներկայացնելու և ինչպես հայտարարել եմ՝ նշանակումը հետագայում եղել է»։
