Լեհաստանի վարչապետ Դոնալդ Տուսկը մերժել է արտահերթ խորհրդարանական ընտրությունների անցկացման հնարավորությունը, եթե իշխող Քաղաքացիական կոալիցիայի թեկնածու Ռաֆալ Տրզասկովսկին պարտվի հունիսի 1-ին կայանալիք նախագահական ընտրությունների երկրորդ փուլում։
«Արտահերթ խորհրդարանական ընտրություններ չեն լինելու»,- ասել է նա՝ անդրադառնալով հարցին TVP Info-ով հեռարձակված ասուլիսում։
«Դրանք տեղի կունենան երկուսուկես տարի հետո՝ ըստ ընտրական օրացույցի»,- հավելել է Լեհաստանի վարչապետը։
Մայիսի 22-ին Լեհաստանի նախկին նախագահ (1995-2005) Ալեքսանդր Կվասնևսկին Radio Zet-ի եթերում չբացառեց արտահերթ խորհրդարանական ընտրությունների անցկացումը, եթե նախագահական ընտրությունների երկրորդ փուլում հաղթի ընդդիմադիր
«Օրենք և արդարություն» կուսակցության թեկնածու Կարոլ Նավրոցկին։
Լեհաստանում նախագահական ընտրությունների առաջին փուլը տեղի է ունեցել մայիսի 18-ին, որի արդյունքներով Տրզասկովսկին (31,36%) և նրա մրցակից Նավրոցկին (29,54%) անցել են երկրորդ փուլ, որը կկայանա հունիսի 1-ին։ Լեհաստանում հաջորդ խորհրդարանական ընտրությունները տեղի կունենան 2027 թվականին։
