Mitsubishi Heavy Industries (MHI) ընկերությունը ներկայացրել է արհեստական ինտելեկտի (AI) աջակցությամբ դրոնների երկու մոդել։ Այս մասին հայտնում է Army Recognition-ը։
«MHI-ի ներկայացուցիչները հաստատել են, որ արհեստական ինտելեկտով հագեցած մարտական աջակցության անօդաչու թռչող սարքերի առաջին փորձնական թռիչքները կիրականացվեն 2025 թվականին՝ ճապոնական գնումների, տեխնոլոգիաների և լոգիստիկայի գործակալության հետ պայմանագրով», - ասվում է նյութում։
Անօդաչու սարքերը ներկայացվել են Ճապոնիայում անցկացվող միջազգային օդատիեզերական ցուցահանդեսի ժամանակ։ ARMDC-20X մոդելի երկարությունը մոտավորապես վեց մետր է: Դրա հիմնական նպատակը հետախուզությունն է լինելու։
Երկրորդ անօդաչու մոդելի անունը դեռ չի նշվում։ Դրա երկարությունը կկազմի 10 մետր։ Միաժամանակ, անօդաչու թռչող սարքը հնարավոր կլինի օգտագործել օդային մարտերի և թիրախները որսալու համար։
Մի քանի ժամ առաջ Nikkei բիզնես թերթը հայտնել էր, որ ճապոնական Նագոյա քաղաքից Prodrone արդյունաբերական անօդաչու թռչող սարքեր արտադրող ընկերությունը նախատեսում է Ուկրաինային մատակարարել անօդաչու սարքեր, որոնք կօգտագործվեն ականազերծման համար։ Այս սարքերը ունակ են շարժվել երկրի մակերեւույթից մոտ 50 սանտիմետր բարձրության վրա։
