Իրանը առաջարկ է ստացել ԱՄՆ-ի հետ իրանական միջուկային ծրագրի շուրջ ճգնաժամի կարգավորման բանակցությունների հինգերորդ փուլի ժամանակի և վայրի վերաբերյալ։ Այս մասին հայտնել է Իսլամական Հանրապետության արտաքին գործերի փոխնախարար Քազեմ Ղարիբաբադին։
«Մենք առաջարկ ենք ստացել Իրանի և ԱՄՆ-ի միջև անուղղակի բանակցությունների հաջորդ փուլի վերաբերյալ, որն այժմ քննարկման փուլում է»,- ասել է նա Իրանի պետական հեռուստատեսության եթերում։
Խոսելով Թեհրանի դեմ ամերիկյան վերջին պատժամիջոցների մասին՝ Ղարիբաբադին նշել է, որ այդ «միակողմանի պատժիչ միջոցները, որոնք հաճախ ներկայացվում են որպես դիվանագիտական գործիքներ, հակասում են միջազգային իրավունքի նորմերին» և «խաթարում են ամբողջ պետությունների տնտեսությունները՝ ծանր վնաս հասցնելով բնակչությանը»։
«Որպես այսպես կոչված առավելագույն ճնշման քաղաքականության մաս, հատկապես սուր են կենսական նշանակության դեղերի և սարքավորումների մատակարարման խափանումները. շատ քաղցկեղով հիվանդներ և քրոնիկ հիվանդություններով հիվանդներ մնում են առանց անհրաժեշտ բուժման», - նշել է դիվանագետը։
