ԱՄՆ նախագահ Դոնալդ Թրամփի վարչակազմը Գազայի հատվածից Լիբիա 1 միլիոն պաղեստինցիների վերաբնակեցման ծրագիր է մշակում։ Այս մասին ուրբաթ հայտնել է NBC հեռուստաալիքը՝ հղում անելով աղբյուրներին։
Նրանց տեղեկությունների համաձայն՝ Վաշինգտոնը խոստանում է ապաշրջափակել Լիբիայի նախկինում սառեցված ակտիվները, եթե համաձայնի ընդունել միգրանտներին։
Վերջնական որոշում դեռ չի կայացվել, քանի որ այս նախաձեռնության իրականացումը, ամենայն հավանականությամբ, կբախվի լուրջ դժվարությունների։ Մասնավորապես, բաց է մնում հարցը, թե Գազայի քանի բնակիչ կամավոր կհամաձայնի մեկնել Լիբիա։
ԱՄՆ-ի վարչակազմը դիտարկում է պաղեստինցիներին ֆինանսական խթաններ տրամադրելու հնարավորությունը, օրինակ՝ նրանց անվճար բնակարանով ապահովելու կամ նույնիսկ նպաստների վճարումը։ Բայց դա լուրջ ծախսեր կպահանջի Վաշինգտոնից։
Հայտնի չէ նաև, թե Լիբիայի որ հատվածում կարող են բնակեցվել պաղեստինցիները և կոնկրետ ինչպես կիրականացվի նրանց վերաբնակեցումը։ Բացի այդ, ևս մեկ միլիոն մարդու ժամանումը Լիբիա կարող է սրել լարվածությունը առանց այն էլ անկայուն երկրում, նշում է հեռուստաալիքը։
