Իսրայելը դժվար թե համարձակվի հարձակվել Իրանի միջուկային օբյեկտների վրա, նրա սպառնալիքները դատարկ են և անհանգստություն չեն առաջացնում Թեհրանում: Այս մասին հայտարարել է Իսլամական Հանրապետության ատոմային էներգիայի կազմակերպության ներկայացուցիչ Բեհրուզ Քամալվանդին։
«Նախ՝ շատ քիչ հավանական է, որ դա տեղի ունենա, երկրորդ՝ նման հիմարության դեպքում շատ քիչ հավանական է, որ նրանք որևէ լուրջ վնաս հասցնեն Իրանին, և երրորդ՝ նույնիսկ վնասի դեպքում երկիրը կկարողանա շատ արագ վերականգնել ամեն ինչ»,- ասել է Քամալվանդին՝ պատասխանելով Nour News պորտալի թղթակցի հարցին՝ Իրանի միջուկային օբյեկտներին Իսրայելի կողմից հարված հասցնելու հավանականության մասին: Նրա խոսքով՝ իսրայելական սպառնալիքները որևէ անհանգստություն չեն առաջացնում Իսլամական Հանրապետությունում, սակայն Թեհրանը, ամեն դեպքում, զգոն է մնում:
Հոկտեմբերի 1-ի երեկոյան Իրանը զանգվածային հրթիռային հարձակում գործեց Իսրայելի վրա՝ ի պատասխան ղեկավարության առանցքային դեմքերի սպանություններին։
