ԱՄՆ նախագահ Դոնալդ Թրամփը հայտարարել է, որ տուրք կսահմանի արտասահմանում արտադրված բոլոր ֆիլմերի վրա՝ պաշտպանելու տեղական կինոարտադրությունը։ Նրա խոսքով՝ ամերիկյան կինոարդյունաբերությունը մահանում է «շատ արագ», և այլ երկրները սուբսիդիաներով «խլում են» արտադրությունները։ Թրամփը հանձնարարել է առևտրի նախարարությանը մեկնարկել 100% մաքսադրույքի կիրառման գործընթացը։ «Մենք ուզում ենք, որ ֆիլմերը կրկին արտադրվեն Ամերիկայում»,– գրել է նա։
Նախատեսվող մաքսի կիրառման մեխանիզմը դեռևս հստակ չէ․ չի նշվում՝ այն կվերաբերի՞ միայն կինոթատրոններում ցուցադրվող ֆիլմերին, թե՞ նաև հոսքային հարթակներին, հայտնում է Reuters-ը։
Ամերիկյան խոշոր կինոընկերությունների բաժնետոմսերը նվազել են հայտարարությունից հետո։ Միաժամանակ, Ավստրալիայի և Նոր Զելանդիայի ղեկավարները խոստացել են պաշտպանել իրենց ազգային կինոարտադրությունը։ Մեծ Բրիտանիայի կինոաշխատողների միությունը՝ Bectu-ն, զգուշացրել է՝ նման մաքսերը կարող են լրջորեն վնասել երկրի կինոարդյունաբերությունը, որը դեռ չի վերականգնվել համավարակից հետո։
Վերլուծաբանները նաև զգուշացնում են, որ պատասխանը կարող է լինել կոշտ և «ավելի շատ վնաս կհասցնի ԱՄՆ-ին, քան օգուտ»։
