Մարտի 31-ից ապրիլի 1-ը Վիեննայում տեղի է ունեցել ԵԱՀԿ Մարդկանց թրաֆիքինգի դեմ պայքարի դաշինքի 25-րդ համաժողովը, որին մասնակցել են նաև Աշխատանքի և սոցիալական հարցերի նախարարի տեղակալ Տաթևիկ Ստեփանյանն ու ԱՍՀՆ մարդկանց թրաֆիքինգի և կանանց հիմնահարցերի բաժնի պետ Սոֆի Բոստանչյանը։ Այդ մասին հայտնում են ԱՍՀ նախարարությունից:
«Մանկության պաշտպանություն, ապագայի ձևավորում. երեխաների թրաֆիքինգի դադարեցման կոչ» խորագիրը կրող համաժողովին ներկա են եղել տարբեր երկրների բարձրաստիճան պաշտոնյաներ, միջազգային և քաղաքացիական հասարակության կազմակերպությունների ներկայացուցիչներ՝ քննարկելու երեխաների իրավունքների պաշտպանության ու երեխաների թրաֆիքինգի դեմ պայքարի ուղղությամբ իրականացվող աշխատանքները, առկա մարտահրավերներն ու դրանց լուծման տարբերակները։
Համաժողովի ընթացքում ելույթով հանդես է եկել նաև Տաթևիկ Ստեփանյանը՝ ընդգծելով Հայաստանի Հանրապետության կողմից իրականացվող աշխատանքների կարևորությունը՝ երեխաների իրավունքների պաշտպանության և թրաֆիքինգի դեմ պայքարի ուղղություններով։ Այս համատեքստում նախարարի տեղակալը ներկայացրել է ոլորտային քաղաքականությունը, մանրամասնել բազմաբնույթ համագործակցությամբ իրականացվող միջոցառումներն ու երեխաների պաշտպանության ոլորտում նախատեսվող օրենսդրական փոփոխությունները։
Անդրադառնալով Հայաստանում շարունակաբար բարելավվող երեխայի և ընտանիքի աջակցությանն ուղղված համայնքահենք ծառայություններին՝ Տաթևիկ Ստեփանյանը խոսել է այլընտրանքային խնամքի, մասնավորապես՝ խնամատարության ինստիտուտի զարգացման, թրաֆիքինգի զոհ դարձած երեխաներին տրամադրվող աջակցության ծրագրերի, սոցիալական և իրավապահ մարմինների աշխատողների համար պարբերաբար իրականացվող մասնագիտացված դասընթացների, ինչպես նաև` Բառնահուս մոդելի ներդրման մասին։
Հաշվի առնելով հակամարտությունների հետևանքով տեղահանված երեխաների հնարավոր խոցելիությունը՝ բանախոսն ընդգծել է նաև ՀՀ դերը՝ հակաթրաֆիքինգային միջոցառումները սոցիալական պաշտպանության համակարգում ինտեգրելու ուղղությամբ։
«Երեխաների թրաֆիքինգից պաշտպանությունը ոչ միայն քաղաքական հանձնառություն է, այլև յուրաքանչյուրիս պարտականությունը։ Հայաստանը պատրաստ է համագործակցել բոլոր շահագրգիռ կողմերի հետ՝ ապահովելու մեր երեխաների ավելի անվտանգ և արդար ապագան»,- ընդգծել է նախարարի տեղակալը։
Համաժողովի շրջանակում Տաթևիկ Ստեփանյանը հանդիպում է ունեցել Շվեդիայի, Գերմանիայի և ԵԱՀԿ-ի ներկայացուցիչների հետ, քննարկել երեխաների պաշտպանության և թրաֆիքինգի դեմ պայքարի ուղղությամբ երկկողմ համագործակցության ընդլայնմանն առնչվող հարցեր։
ԵԱՀԿ-ի մարդկանց թրաֆիքինգի հարցերով հատուկ ներկայացուցիչ Քարի Ջոնսթոնի հետ ունեցած հանդիպման ընթացքում նախարարի տեղակալը ներկայացրել է ոլորտային բարեփոխումները և ընդգծել միջազգային գործընկերների հետ շարունակական համագործակցության կարևորությունը։ Քարի Ջոնսթոնը ևս ողջունել է թրաֆիքինգի դեմ պայքարի շրջանակում համատեղ նախաձեռնություններ իրականացնելու և փորձի փոխանակմանն ուղղված աշխատանքները․ վերջինս նաև պատրաստակամություն հայտնել առաջիկայում գործուն քայլեր իրականացնել այդ ուղղությամբ։
