Ապագայում Ուկրաինան կկարողանա բուֆերային գոտի դառնալ Ռուսաստանի և Եվրամիության միջև միայն հստակ կարգավորմամբ և շահագրգիռ կողմերի, այդ թվում՝ Մոսկվայի շահերի հարգմամբ։ Այս մասին Financial Times-ին (FT) տված հարցազրույցում ասել է Հունգարիայի՝ ԵՄ հարցերով նախարար Յանոշ Բոկան։
«Ուկրաինան կարող է գործել որպես բուֆերային գոտի միայն այն դեպքում, եթե գլոբալ խաղացողների միջև լինի կոնսենսուս այն մասին, թե ինչ կարելի է անել և ինչ չի կարելի անել Ուկրաինայի տարածքում, հակառակ դեպքում դա կլինի հակամարտության գոտի, ոչ թե բուֆերային գոտի»,- ասել է նախարարը։
«Եթե Միացյալ Նահանգները կամ ԵՄ-ն Ուկրաինայում ինչ-որ բան անեն առանց Ռուսաստանի նախագահ Վլադիմիր Պուտինի հավանության, դա ինքնին հակամարտության աղբյուր կդառնա»,- ընդգծել է Բոկան։
Միաժամանակ, FT-ի զրուցակիցը նշել է, որ իսկապես կա նման գոտի ստեղծելու անհրաժեշտություն, և Ուկրաինան այդ կարողություններում ավելի օգտակար կլիներ առանց եվրոպական պաշտպանական կառույցին ինտեգրվելու։
