Ռուսաստանի նախագահ Վլադիմիր Պուտինն անձամբ է շնորհավորել Բադրա Գունբային Աբխազիայի նախագահական ընտրություններում տարած հաղթանակի կապակցությամբ։
«Ուրախ եմ ձեզ տեսնելու և ուզում եմ շնորհավորել ընտրություններում ձեր հաղթանակի կապակցությամբ, դուք հավաքել եք 54,7 տոկոս՝ 70 տոկոս մասնակցությամբ, լավ արդյունք է, շնորհավորում եմ ձեզ», - նշել է ՌԴ նախագահը։
Պուտինը պարզաբանել է, որ երկրում նախընտրական քարոզարշավը եղել է բուռն ու «էմոցիոնալ», սակայն այս դեպքում գլխավորն այն է, որ քաղաքացիները եկել ու հայտնել են իրենց նախասիրությունները։
Ռուսաստանի ղեկավարը նաև ընդգծել է Մոսկվայի և Սուխումի միջև հարաբերությունների առանձնահատուկ բնույթը և հայտարարել, որ երկրները համատեղ կլուծեն խնդիրներն ու դժվարությունները։
Ավելի վաղ Կրեմլը հայտնել էր, որ Վլադիմիր Պուտինը հեռագրով շնորհավորել է Բադրա Գունբաին ընտրություններում հաղթանակի կապակցությամբ։
Հիշեցնենք, որ Աբխազիայում նախագահական ընտրությունների երկրորդ փուլը կայացել է մարտի 1-ին։ Մասնակցությունը կազմել է մոտ 70 տոկոս։ Հանրապետության կենտրոնական ընտրական հանձնաժողովը և դիտորդները արձանագրել են ընտրողների բարձր ակտիվություն։
Մարտի 2-ին Կենտրոնական ընտրական հանձնաժողովը հայտարարեց Աբխազիայի նախագահ Գունբայի ընտրվելու մասին։ Տրված ձայների ընդհանուր թվից (առանց փչացած քվեաթերթիկների և «բոլորին դեմ» քվեների) նա ստացել է 56,85%, իսկ երկրորդ թեկնածուն՝ Ադգուր Արձինբան՝ 43,15%:
Թարգմանությունը՝ Մանուել Թամազյանի
