Փետրվարին «Ուիգմոր» բժշկական կենտրոնում պլաստիկ վիրահատության հետևանքով կնոջ մահվան դեպքի առթիվ նախաձեռնվել է քրեական վարույթ:
Այս մասին Euromedia24-ին փոխանցեց Քննչական կոմիտեի մամուլի խոսնակ Կիմա Ավդալյանը:Թե ինչ ընթացք է տրվել գործին՝ Կիմա Ավդալյանը նշեց․ «Դեպքի առթիվ նախաձեռնվել է քրեական վարույթ՝ Քրեական օրենսգրքի 187-րդ հոդվածի 2-րդ մասի հատկանիշներով:
Նշանակվել է դիակի դատաբժշկական փորձաքննություն: Այս պահին կատարվում են անհրաժեշտ ապացուցողական և վարութային գործողություններ»,- ասաց նա։
Նշենք, որ 187-րդ հոդվածի 2-րդ մասի հատկանիշները ենթադրում են բուժաշխատողի կողմից մասնագիտական պարտականությունները չկատարելը կամ ոչ պատշաճ կատարելը։
Հիշեցնենք՝ երեկ «Առողջության իրավունք» ՀԿ համահիմնադիր, իրավապաշտպան Անուշ Պողոսյանը ահազանգել էր, որ Մ.Մ.-ն ընդունվել է Ուիգմոր փետրվարի 18-ին՝ ակնկալիքներով, որ պլաստիկ վիրահատություններից հետո դուրս է գրվելու ավելի գեղեցիկ և կատարյալ ֆիզիկական վիճակում:
Ըստ նրա, տիկինը խրոնիկական հիվանդություններով չի տառապել, առողջական խնդիրներ, բողոքներ չի ունեցել:
Նրան կատարել են սիմուլտան (համակցված) վիրահատություններ՝ որովայնի պալստիկա և զուգահեռ ևս մեկ այլ տեղակայման պլաստիկ վիրահատական միջամտություն:
Սակայն հիվանդի վիճակը հետվիրահատական 2-րդ օրը կտրուկ վատացել է, նրան տեղափոխել են վերակենդանացման բաժանմունք, որտեղ հիվանդի վիճակը էլ ավելի է վատացել՝ գնահատվել է ծայրահեղ ծանր, հաջորդիվ՝ փետրվարի 21-ին, նրան տեղափոխել են Էրեբունի ԲԿ-ի վերակենդանացման բաժանմունք, որտեղ նույն օրը երեկոյան ժամը 23:30-ի սահմաններում Մ.Մ.-ի մոտ արձանագրվել է կենսաբանական մահ:
Ի դեպ, շրջանառվող տեղեկությունների համաձայն, «Ուիգմոր» ԲԿ-ն փոխկապակցված է Առողջապահության նախարար Անահիտ Ավանեսյանի ընտանիքի հետ, թեև ինքը՝ նախարարը հերքել է լուրերը։
Նկատենք, որ Հայաստանում պլաստիկ վիրահատության ժամանակ մահվան դեպքերը գնալով ավելանում են։ Այդպիսի մի դեպք էլ գրանցվեց ամիսներ առաջ՝ 2024 թ․ հուլիսի 5-ին, «ԱրթՄեդ» ԲԿ-ում քթի պլաստիկ վիրահատության ժամանակ։
Սոնա Հարությունյան
