«Դատարանում 1in.am-ի դեմ «Ֆոտոլուր»-ի տարած հաղթանակը նախադեպ է։ Մեր լուսանկարները շատ են օգտագործում, իմացեք, որ գրեթե բոլոր լուսանկարիչների լուսանկարները հիմնականում օգտագործվում են անօրինական»,-«Արմենպրես» մամուլի ակումբում հայտարարեց «Ֆոտոլուր» գործակալության տնօրեն Մելիք Բաղդասարյանը։Հ
իշեցնենք, որ դատարանը «Սկիզբ մեդիա կենտրոն»-ին պարտավորեցրել է դադարեցնել «Հեղինակային իրավունքների և հարակից իրավունքների մասին» օրենքի իմաստով «Ֆոտոլուր» ՍՊԸ լրատվական գործակալության հեղինակային իրավունքի օբյեկտ հանդիսացող լուսանկարչական ստեղծագործությունների արտատպումը, տարածումը և օգտագործումը:
Դատարանը որոշել է «Սկիզբ մեդիա կենտրոն» ՍՊ ընկերությունից հօգուտ «Ֆոտոլուր» ՍՊԸ լրատվական գործակալության բռնագանձել 2.400.000 ՀՀ դրամ՝ որպես հոնորարի կրկնապատիկի գումար:Մելիք Բաղդասարյանն ասաց, իրենց լուսանկարների հեղինակային իրավունքները խախտվում են ամենուր, դրանք օգտագործվում են անօրինական կերպով, բանավոր զգուշացումներն էլ օգուտ չեն տալիս։
«Ես բավականին հետևողական կերպով շարունակելու եմ այս դատական գործընթացները, ինչքան էլ որ դժվար լինի։
Այստեղ չեն ընդունում, որ լուսանկարն արժեք ունի, հեղինակային իրավունք գոյություն ունի, այն մարդիկ են ստեղծում։ Իրենք պատճառաբանում են՝ ինտերնետից են վերցրել, բայց դա վերցնելու ու օգտագործելու համար չի հրապարակվել»,-ասաց գործակալության ղեկավարը։
Փաստաբան Անի Դավթյանն էլ ընդգծեց, եթե լուսանկարը համացանցում է, դա չի նշանակում, որ նկարը չունի հեղինակային իրավունք կամ դրա համար պետք չէ ստանալ օգտագործման թույլտվություն։
