Եվրոպական տարածաշրջանում գրիպով հիվանդացության հետևանքով հոսպիտալացման թվի աճ կարող է նկատվել առաջիկա շաբաթներին։ Այդ կանխատեսմամբ հանդես է եկել Առողջապահության համաշխարհային կազմակերպությունը (ԱՀԿ), որը կոչ է արել մեծ ուշադրություն դարձնել բնակչության խոցելի խմբերի, ներառյալ տարեցների և հղի կանանց պաշտպանությանը։ Այդ մասին հայտնում է ՏԱՍՍ գործակալությունը։
Գրիպի վիրուսի ակտիվությունը սովորաբար գնահատվում է թեստերի հիման վրա, որոնց 50-60 %-ը հունվարի վերջին կամ փետրվարին հաստատում են հիվանդության առկայություն։ Սակայն թեստերի 36%-ն է գրիպի դրական արդյունք ցույց տվել։
«Դա վկայում է, որ սեզոնը դեռ չի հասել իր առավելակետին, և հոսպիտալացումների թիվը, հավանաբար, կշարունակի աճել առաջիկա շաբաթներին», – նշել են ԱՀԿ-ում:
2024 թվականի նոյեմբերի վերջին սեզոնային գրիպի համաճարակի պաշտոնական սկզբից ի վեր, «շնչառական վարակների ցուցանիշները շարունակել է աճել ԱՀԿ-ի ամբողջ եվրոպական տարածաշրջանում», հիշեցրել է համաշխարհային կազմակերպությունը։ ԱՀԿ-ն ընդգծել է, որ «չնայած գրիպի սեզոնի մասշտաբները գտնվում են սպասվող ընդգրկույթի սահմաններում, կարևոր է, որ առողջապահության մարմինները և առանձին անձինք շարունակեն ակտիվորեն աշխատել վարակի տարածման սահմանափակման և բնակչության առավել խոցելի խմբերի, ներառյալ տարեց մարդկանց, հղի կանանց, թուլացած իմունիտետով և քրոնիկական հիվանդություններ ունեցող մարդկանց պաշտպանության նպատակով»:
ԱՀԿ-ն նաև ուշադրություն է հրավիրել այն սպառնալիքի վրա, որն առողջության համար նախկինի պես ներկայացնում է COVID-19-ը, թեև հիվանդացածների թիվն այժմ այնքան մեծ չէ, որքան համավարակի ամենաակտիվ շրջանում։
Ըստ կազմակերպության՝ «կարևոր է լինել զգոն և կիրառել պաշտպանիչ միջոցներ»՝ հաշվի առնելով, որ իրավիճակը կարող է ցանկացած պահի փոխվել դեպի վատը, «օրինակ՝ մեծ վարակելիությամբ կորոնավիրուսի տարբերակների ի հայտ գալով»։ ԱՀԿ-ն վստահ է, որ «պատվաստումները մնում են կենսականորեն կարևոր միջոց բնակչության առավել խոցելի խավերի կյանքի փրկության համար»:
