ԱՄՆ նախագահ Դոնալդ Թրամփը երկուշաբթի օրը կրկին Կուբան ներառել է ահաբեկչությունը հովանավորող պետությունների ցուցակում։ Այս մասին հայտնում է Սպիտակ տան մամուլի ծառայությունը։
Այսպիսով, նրա նախորդի՝ Ջո Բայդենի հրամանը՝ երկիրը այս ցուցակից հանելու մասին, ուժի մեջ էր ընդամենը մեկ շաբաթ։
Հունվարի 14-ին Բայդենը Կուբան հանել է ահաբեկչությունը հովանավորող պետությունների ցուցակից։ Նա նաև կասեցրել է Հելմս-Բերթոնի ակտի մի մասը՝ դրանով իսկ դադարեցնելով ԱՄՆ քաղաքացիների՝ Կուբայում պոտենցիալ բռնագրավված գույքը ԱՄՆ դատարաններում հայց ներկայացնելու հնարավորությունը:
Իր երդմնակալությունից հետո երկուշաբթի օրը Թրամփը չեղյալ հայտարարեց նախորդ վարչակազմի կողմից ձեռնարկված 78 միջոցները: Դրանց թվում է մեկ շաբաթ առաջ Բայդենի որոշումը Կուբայի կարգավիճակի վերաբերյալ։
2014 թվականի դեկտեմբերին Միացյալ Նահանգների այն ժամանակվա նախագահ Բարաք Օբաման խոստովանեց, որ Հավանայի նկատմամբ Վաշինգտոնի նախկին քաղաքականությունը չի աշխատում և հայտարարեց երկկողմ հարաբերությունների կարգավորմանն ու պատժամիջոցների մեղմացմանն ուղղված քայլերի մասին: 2015 թվականին Օբամայի վարչակազմը հայտարարեց Կուբան ահաբեկչությունը հովանավորողների ԱՄՆ ցուցակից հանելու մասին։
