ԱՄՆ նախագահ Ջո Բայդենի վարչակազմը միջոց է փնտրում՝ TikTok սոցիալական ցանցն ամերիկացի օգտատերերի համար հասանելի դարձնելու համար, հայտնում է NBC News-ը։ Հեռուստաալիքի տվյալներով՝ Սպիտակ տունը փորձում է շրջանցել ծառայության ուժի մեջ մտնող արգելքը։
Euromedia24.com-ի փոխանցմամբ՝ հունվարի 19-ից ԱՄՆ-ում սոցիալական ցանցը կդադարեցնի հասանելիությունը: Ներկայումս TikTok-ն ունի մոտ 170 միլիոն օգտատեր ԱՄՆ-ում:
Ավելի վաղ հայտնի էր դարձել, որ ԱՄՆ նորընտիր նախագահ Դոնալդ Թրամփը դիտարկում է ԱՄՆ-ում սոցցանցի արգելքը կանխելու գործադիր հրաման արձակելու հնարավորությունը։ Այս կերպ նա ցանկանում է ժամանակ շահել՝ համաձայնեցնելու չինական ByteDance ընկերությանը պատկանող հարթակը վաճառելու գործարքի կամ այլընտրանքային տարբերակ գտնելու համար։
2024 թվականին ԱՄՆ-ում օրենք ընդունվեց, որը ByteDance-ի ղեկավարությանը պարտավորեցնում էր կա՛մ վաճառել սոցիալական ցանցը, կա՛մ դադարեցնել իր գործունեությունը ԱՄՆ-ում։ Ընդ որում, այս օրենքը վիճաբանության առարկա դարձավ ոչ միայն ամերիկյան հասարակության, այլեւ իշխանության ամենաբարձր օղակներում։
Դեկտեմբերի վերջին Թրամփը կոչ արեց չեղարկել օրենքը՝ նշելով, որ ինքը «ջերմ զգացմունքներ» ունի հավելվածի նկատմամբ, քանի որ նախագահական ընտրություններում «երիտասարդ լսարանը» հաղթել է «34 տոկոսային կետ առավելությամբ»։
