Երբ ավստրալացի մոդել Էլլի Գոնսալվեսը նշեց այն բոլոր 118 պատճառները, թե ինչու չի ցանկանում երեխաներ ունենալ, նրան անվանեցին սին, եսասեր եւ, նույնիսկ, «անպիտան մայր»:
«Մարդիկ կարծում են, որ ես ատում եմ երեխաներին»,-Stellar-ին ասել է մոդելը,-«Բայց ես սիրով եմ գրկում իմ զարմուհուն եւ զարմիկին։ Ես սիրում եմ փոքրիկ երեխաներին»:
33-ամյա կինը, ով Facebook-ում եւ Instagram-ում հինգ միլիոն հետեւորդ ունի, հանրության շրջանում մեծ բանավեճ է հրահրել մայրության վերաբերյալ՝ այս տարվա նոյեմբերին հրապարակելով իր պատճառների ցուցակը։
«Տարիներ շարունակ ինձ հարցնում էին, թե ինչու ես երեխաներ չեմ ուզում ունենալ, եւ ես կազմեցի այս ցուցակը, քանի որ միշտ զգում էի, որ կարճ բացատրությունը համոզիչ կամ բավականաչափ պարզ չէ»,-իր ցուցակին կից մակագրել է նա։
Պատճառների թվում նա նշել է հղիության ընթացքում մազաթափությունը, մոլորակի գերբնակեցումը, եւ այն, որ երեխան կարող է սերիական մարդասպան դառնալ։
Թեեւ եղել են բազմաթիվ քննադատներ, Գոնսալվեսը պատմել է, որ նա նաեւ շնորհակալական խոսքեր է ստացել կանանցից, ովքեր նույնն էին զգում, բայց վախենում էին բարձրաձայնել:
«Ինձ համար կարեւոր է լինել այս մարդկանց ձայնը։ Սա նաեւ հնարավորություն է, որ այն մարդիկ, ովքեր չեն ցանկանում երեխա ունենալ, մի փոքր ավելի շատ համակրանք ստանան»,-ասել է նա։
Գոնսալվեսը, ով 15 տարի ամուսնացած է Ռոս Սքաթսի հետ, ասում է, որ իրենք «շատ, շատ են աշխատել իրենց խաղաղության համար»: «Այժմ մենք պարզապես չենք ցանկանում խաթարել այդ խաղաղությունը»,-հավելել է նա,-«Եվս մեկ մարդու մեր դինամիկ առօրյա ներառելը արմատապես կփոխեր իրավիճակը»:
Նրա խոսքով՝ այս որոշմանը նպաստել են նաեւ սեփական մոր հետ լարված հարաբերությունները։
Այս շաբաթ The Courier Mail-ի հետ զրույցում Գոնսալվեսը պատմել է սիրելի հոր ինքնասպանության մասին:
«Երբ հայրս մահացավ, ինձ մի դադար էր պետք՝ ուղղակի մտածելու համար։ Սա իսկական շրջադարձ էր իմ կյանքում: Ես, պարզապես, չկորցրի հորս, ես իրականում որոշում կայացրի հեռանալ այն ամենից, ինչ գիտեի եւ ինչն ինձ հարմար էր... Մարդիկ պետք է ունենան հիանալի, աջակցող ընտանիքներ: Բայց շատերի համար դա անիրատեսական է»։
Ավստրալացի մոդելը նշել է 118 պատճառ, թե ինչու չի ցանկանում երեխա ունենալ
15.05.2024 20:32 |
Կատեգորիա
Ժամանց
