Սիրիայի նոր իշխանությունները մտադիր են ռազմավարական հարաբերություններ պահպանել իրենց հարեւան Թուրքիայի հետ։ Դամասկոսում իշխանության եկած զինված խմբավորումների առաջնորդ Ահմեդ ալ-Շարաան, ով հայտնի է Աբու Մուհամեդ ալ Ջուլանի մականունով, Yeni Şafak թերթին ասել է.
«Մենք կունենանք ռազմավարական հարաբերություններ Թուրքիայի հետ: Թուրքիան շատ առաջնահերթություններ ունի նոր սիրիական պետության ստեղծման հարցում: Կլինեն փոխադարձ առևտրային կապեր, մենք հավատում ենք, որ Թուրքիան տնտեսական զարգացման իր փորձը կփոխանցի Սիրիա»,- ասել է նա:
Ալ-Շարաան հույս է հայտնել, որ 2011 թվականից փախած սիրիացիների կեսը կվերադառնա հայրենիք։ «Սիրիացիները ապաստան գտան շատ երկրներում, բայց Թուրքիան ամենից շատ ընդունեց նրանց, ավելի շատ հարգանքով վերաբերվեց նրանց, քան մյուսներին», - ավելացրել է նա:
Թուրքիայի ներքին գործերի նախարարության տվյալներով՝ հանրապետության տարածքում կարող են լինել 2,9 միլիոն սիրիացի փախստականներ։ Թուրքիայի նախագահ Թայիփ Էրդողանը ավելի վաղ հայտարարել էր մոտ 1 միլիոն փախստականների Սիրիա վերադարձն ապահովելու ծրագրերի մասին։ Սիրիայում Բաշար Ասադի վարչակազմի տապալումից հետո սիրիացիները Թուրքիայից սկսել են վերադառնալ հայրենիք։
