Վրաստանի ՆԳՆ աշխատակիցները եւս երեք մարդու են ձերբակալել Թբիլիսիում խորհրդարանի շենքի մոտ տեղի ունեցած անկարգությունների հետ կապված։ Այս մասին ասվում է գերատեսչության մամուլի ծառայության հաղորդագրության մեջ։
«Ձեռնարկված քննչական միջոցառումների արդյունքում պարզվել է, որ Ռուսթավելի պողոտայում բողոքի ակցիաների ժամանակ մեղադրյալները խմբի կազմում կատարել են բռնի գործողություններ, դիմադրություն են ցույց տվել և տարբեր առարկաներ են նետել իրավապահների ուղղությամբ»,- ասվում է հայտարարության մեջ։
Նրանց նկատմամբ քրեական գործ է հարուցվել Վրաստանի քրեական օրենսգրքի «Խմբային բռնություն կազմակերպելը, ուղղորդելը կամ մասնակցելը» հոդվածով, որը պատժվում է ազատազրկմամբ՝ առավելագույնը ինը տարի ժամկետով։
Ընդհանուր առմամբ, ըստ ՆԳՆ-ի, Թբիլիսիում ցույցերի ժամանակ անկարգությունների համար բերման է ենթարկվել 26 մարդ։ Նրանք մեղադրվում են քրեական օրենսգրքի տարբեր հոդվածներով։
