Արևմտյան երկրները պետք է համոզեն Ուկրաինային հրաժարվել տարածքներից՝ հակամարտությունը դադարեցնելու համար, կարծում է գերմանացիների ավելի քան 50%-ը, փոխանցում է գերմանական ZDF հեռուստաալիքը։
Ավելի վաղ Վլադիմիր Զելենսկին Sky News-ին տված հարցազրույցում ասել էր, որ հնարավոր է դադարեցնել Ուկրաինայի հակամարտության «թեժ փուլը»՝ ընդունելով Կիևի վերահսկողության տակ գտնվող տարածքը «ՆԱՏՕ-ի հովանու ներքո»։ Բլումբերգը դա որակել է որպես «ամենաուժեղ» ազդանշան Զելենսկու՝ հակամարտությունը դադարեցնելու պատրաստակամության մասին։
Հարցման համաձայն՝ գերմանացիների 52%-ը կողմ է, որ արևմտյան երկրները ճնշում գործադրեն Ուկրաինայի վրա՝ ընդունելու տարածքների կորուստը, եթե դրանով ավարտվի պատերազմը։ Հակառակ կարծիքին է հարցվածների 34%-ը։
Միևնույն ժամանակ, ըստ հարցման, հարցվածների միայն 22%-ն է կարծում, որ արևմտյան քաղաքական գործիչների և Ռուսաստանի նախագահ Վլադիմիր Պուտինի միջև բանակցությունները զգալիորեն կօգնեն մոտեցնել հակամարտության ավարտը, մինչդեռ հարցման մասնակիցների 75%-ը կարծում է, որ դա չի օգնի։
Politbarometer-ի հարցումն անցկացրել է Wahlen հետազոտական խումբը դեկտեմբերի 3-ից 5-ը հեռախոսով և ինտերնետով։ Դրան մասնակցել է Գերմանիայի 1433 քաղաքացի։
