Սիրիայի Հալեպ քաղաքի անակնկալ գրավումից մեկ շաբաթ անց քաղաքն աստիճանաբար վերադառնում է կյանքի նորմալ հուն։ Այս մասին հաղորդում է Reuters գործակալությունը՝ տեսանյութերի և բնակիչներից մի քանիսի վկայությունների հիման վրա։ Գործակալությունը նշում է, որ գիշերվա պարետային ժամը չեղարկվել է, խանութներում նորից հաց են վաճառում, ինտերնետային կապը բարելավվել է։ Նոյեմբերի 27-ին «Հայաթ Թահրիր աշ-Շամ» խմբավորման գլխավորությամբ գրոհայինները հարձակում են սկսել՝ գրավելով Հալեպը, իսկ դեկտեմբերի 5-ին՝ նաև Հոմսը։ «Հայաթ Թահրիր աշ-Շամ»-ն ահաբեկչական է ճանաչված ԱՄՆ-ի, Թուրքիայի, Ռուսաստանի, ՄԱԿ-ի կողմից։ Խմբավորումը տարիներ շարունակ փորձում է փոխել իր մասին ընկալումները։
Ըստ վերլուծաբանների՝ Հալեպում ձեռնարկված միջոցներով խմբավորումը փորձում է ցույց տալ, որ կենսունակ այլընտրանք է նախագահ Բաշար ալ Ասադի կառավարությանը։ Ձգտելով հանգստացնել Հալեպի բնակիչներին, այդ թվում՝ փոքրամասնություններին, լրագրողներին և պետական ծառայողներին՝ «Հայաթ Թահրիր աշ-Շամ»-ը հայտարարություններ է հրապարակել տեքստային հաղորդագրությունների միջոցով՝ ասելով, որ իրենց կողմից քաղաքի վերահսկողությունը նրանց վտանգի չի ենթարկի:
Խմբավորումը նաև խոստացել է, որ հիմնական ծառայությունները կշարունակեն մատուցվել: Reuters-ը նշում է, որ քրիստոնյաները հիմնականում մնացել են քաղաքում, իսկ կիրակի օրը պատարագ են մատուցել, որին այցելել են նաև որոշ գրոհայիններ։
Միևնույն ժամանակ Reuters-ը նշում է, որ Հալեպի փողոցներում դեռ աղբ է կուտակված։ Բնակիչները վախենում են, որ բավականաչափ ջուր չեն ունենա կամ դիզել՝ տները ջեռուցելու համար։ Բնակիչները նշել են, որ, այնուամենայնիվ, ուրախ են, որ կյանքը շարունակվում է. շուկաները, հացի փռերը և բենզալցակայանները բաց են, չնայած մեծ հերթերին և բարձր գներին։
Reuters-ը նաև նշում է, որ ըստ տեսանյութերի՝ «Հայաթ Թահրիր աշ-Շամ»-ը, Սիրիայի կառավարական ուժերի զինվորներին հատուկ ժամանակավոր քարտ է տրամադրում, որը նրանց պաշտպանում է հնարավոր պատժից։ Նման քարտեր տրամադրող կենտրոնների դիմաց տասնյակ կառավարական ուժերի հերթեր են գոյացել։ Այդ կենտրոններում աշխատում են դիմակավորված գրոհայիններ՝ սև համազգեստով։
