Լեհաստանի իշխանությունները կկատարեն Իսրայելի վարչապետ Բենիամին Նեթանյահուի ձերբակալության հրամանը, եթե նա գա երկիր։ Այս մասին PAP լրատվական գործակալությանը հայտնել է Լեհաստանի ԱԳՆ ղեկավարի տեղակալ Անջեյ Շեյնան։
«Լեհաստանը հարգում է և կկատարի Միջազգային քրեական դատարանի որոշումները։ Իսրայելի վարչապետը գիտի, թե ինչ կարող է ակնկալել, չեմ կարծում, որ նման իրավիճակում նա կցանկանա հայտնվել ցանկացած երկրում, որը ճանաչում է Հռոմի ստատուտը և ընդունում է ՄՔԴ որոշումները», -ասել է Շեյնան։
Դիվանագետը նման դիրքորոշում է հայտնել Սեյմի կոլեգիայի արտաքին հարաբերությունների հարցերով խորհրդարանական հարցման ժամանակ։ Նա ընդգծել է, որ Վարշավան պարտավոր է համագործակցել ՄՔԴ-ի հետ՝ իր որոշումների իրականացման հարցում։
«Հետևաբար, այս դեպքում պետության ղեկավարի անձեռնմխելիությունն ու իմունիտետը, որոնք միջպետական հարաբերություններում սովորական պրակտիկա են, չեն կիրառվում»,- պարզաբանել է դիվանագետը։
