Սիրիական ԶՈՒ-ն Համա քաղաքից վերաբաշխել է իր ուժերը քաղաքից դուրս ամրացված դիրքեր՝ խուսափելու համար բնակելի թաղամասերում բախումներից՝ խաղաղ բնակիչների կյանքը չվտանգելու նպատակով, հինգշաբթի հայտնել է Սիրիայի պաշտպանության նախարարությունը, փոխանցում է «ՌԻԱ Նովոստի»-ն:
«Քաղաքում բախումների ընթացքում խաղաղ բնակչության կյանքը պահպանելու նպատակով զորամասերը վերաբաշխվել են և տեղափոխվել քաղաքից դուրս գտնվող դիրքեր»,- ասվում է հաղորդագրության մեջ։
Ըստ հաղորդագրության՝ վերջին օրերին կատաղի մարտերը շարունակվել են միաժամանակ մի քանի ուղղություններով, ոչնչացվել են մեծ թվով ահաբեկիչներ և նրանց տեխնիկան։
Հինգշաբթի օրվա երկրորդ կեսին մարտերը թեժացել են, ինչը հանգեցրել է Սիրիայի Արաբական Հանրապետության զինված ուժերի անձնակազմի կորուստների։
«Ահաբեկչական խմբավորումները կարողացել են ներթափանցել քաղաքի բնակելի թաղամասեր՝ չնայած իրենց շարքերում կրած մեծ կորուստներին», – ասվում է հաղորդագրությունում։
