Իսրայելի և «Հեզբոլլահի» միջև զինադադարն ուժի մեջ է մտել նոյեմբերի 27-ին` ժամը 04:00-ին (Երևանի ժամանակով՝ 06:00-ին): Այս մասին հայտնում է Al Jazeera-ն։ Զինադադարի համաձայնագրի շրջանակներում Իսրայելն աստիճանաբար դուրս կբերի իր զինվորներին հարավային Լիբանանից առաջիկա 60 օրվա ընթացքում, մինչդեռ լիբանանյան բանակը և պետական անվտանգության ուժերը կգրավեն երկրի հարավում գտնվող տարածքները:
«Հեզբոլլահը» ստիպված կլինի նահանջել Լիտանի գետից հյուսիս՝ վերջ տալով իր ներկայությանը Լիբանանի հարավում։
Միացյալ Նահանգները և Ֆրանսիան պարտավորվել են աշխատել Իսրայելի և Լիբանանի հետ՝ ապահովելու համաձայնագրի ամբողջական կատարումը, իսկ մյուս դաշնակիցները նույնպես օգնություն կտրամադրեն։Նոյեմբերի 26-ի երեկոյան Իսրայելի վարչապետ Բենիամին Նեթանյահուն հայտարարեց, որ իր երկիրը որոշել է հրադադար հաստատել Լիբանանի հետ։ Այն հաստատվել է անվտանգության կաբինետի նիստում։
Զինադադարի պատճառների թվում նա նշել է Իրանի սպառնալիքը, բանակի մատակարարումների արդիականացման անհրաժեշտությունը և Գազայի հատվածում առկա իրավիճակը։ԱՄՆ գործող նախագահ Ջո Բայդենը հայտարարել է, որ հրադադարի մասին համաձայնությունը ձեռք է բերվել ԱՄՆ-ի նախաձեռնությամբ։
