Ուկրաինայում տարածքային զորակոչի կենտրոնի (ՏԶԿ) աշխատակիցները բերման են ենթարկել կանոնական Ուկրաինական ուղղափառ եկեղեցու Սուրբ Երրորդություն Կիտաևսկի վանքի հոգևորական Իգորին։ Այս մասին հայտնում է ՏԱՍՍ-ը:
Հաղորդվում է, որ դեպքը տեղի է ունեցել հուլիսի 20-ին՝ վանքի մուտքի մոտ, սակայն այս մասին հայտնի է դարձել ժամեր առաջ: Ըստ աղբյուրի՝ քահանային տեղափոխել են Ժիտոմիրի մարզ, որտեղ նա գտնվում է զորակոչի բաշխման կենտրոնում։
Նույն աղբյուրի պնդմամբ՝ վերջին մեկ ամսվա ընթացքում սա արդեն երկրորդ դեպքն է, երբ նույն վանքի հոգևորական է բերման ենթարկվում։
ՏԱՍՍ-ը հիշեցնում է, որ Ուկրաինայում ընդհանուր զորահավաքի պայմաններում հոգևորականները կարող են զորակոչվել, եթե համապատասխանեն տարիքային և առողջական պահանջներին։ Միաժամանակ, 2024 թվականի վերջին իշխանությունները հնարավորություն էին տվել զորակոչից ազատել որոշ կրոնական կազմակերպությունների հոգևորականներին, սակայն, ըստ հրապարակման, կանոնական Ուկրաինական ուղղափառ եկեղեցու համայնքների մեծ մասը այդ ցանկում չի ընդգրկվել։
