ԵՄ խորհուրդը որոշել է ընդլայնել ԵՄ պատժամիջոցները՝ կապված Իրանի և Ռուսաստանի միջև ռազմատեխնիկական համագործակցության և Մերձավոր Արևելքի և Կարմիր ծովի տարածաշրջանում զինված խմբերին ու կազմակերպություններին աջակցելու հետ:
«Այս լրացուցիչ միջոցառումն ուղղված է նավերով ու նավահանգիստներով իրանական անօդաչու թռչող սարքերի, հրթիռների և հարակից տեխնոլոգիաների և բաղադրիչների տեղափոխման դեմ։ Այսօրվա որոշումն արգելում է ԵՄ-ից Իրան հրթիռների և անօդաչու թռչող սարքերի մշակման և արտադրության մեջ օգտագործվող բաղադրիչների արտահանումը, փոխանցումը, մատակարարումը կամ վաճառքը», – ասվում է ԵՄ խորհրդի երկուշաբթի օրը հրապարակված կոմյունիկեում:
Դրա հետ մեկտեղ խորհուրդը սահմանափակող միջոցներ է ձեռնարկել մեկ անձի և չորս կազմակերպությունների նկատմամբ, որոնք, իր գնահատմամբ, ներգրավված են Իրանի և Ռուսաստանի Դաշնության միջև ռազմատեխնիկական համագործակցության մեջ։
