Աբխազիայում նախագահական ընտրությունները պետք է անցկացվեն օրինական և ժողովրդավարական կարգով: Այս մասին հայտարարել է ընդդիմության առաջնորդներից մեկը՝ «Աբխազական ժողովրդական շարժում» հասարակական կազմակերպության նախագահ Ադգուր Արձինբան ( Adgur Ardzinba )՝ ելույթ ունենալով կողմնակիցների հետ, հայտնում են վրացական լրատվամիջոցները։
«Առաջիկա ընտրությունները պետք է անցկացվեն օրինական, ժողովրդավարական կարգով, որպեսզի չլինեն խախտումներ և վարչական ռեսուրսի օգտագործում՝ ի օգուտ որևէ մեկի»,- ասել է նա։
Ավելի վաղ Արձինբան հայտնել էր, որ աբխազական ընդդիմությունը համաձայնել է, որ հանրապետության նախագահի պարտականությունները պետք է կատարի փոխնախագահ Բադրա Գյունբան։ Նրա խոսքով՝ ընդդիմությունը մերժել է Աբխազիայի ներկայիս նախագահ Ասլան Բժանիայի առաջարկը, որ նա հրաժարականի դիմում կստորագրի միայն այն բանից հետո, երբ ընդդիմությունը կլքի կառավարական շենքերի համալիրը։
