Ազգերի լիգայի խաղարկության խմբային փուլի վերջին հանդիպումը Լատվիայի հավաքականի հետ ռազմավարական նշանակություն ուներ։ Պարտվելու դեպքում Հայաստանի հավաքականը հայտնվում էր ամենաթույլ՝ D լիգայում հանդես գալու սպառնալիքի տակ։
Հայաստանի ազգային հավաքականը Ազգերի լիգայի խմբային փուլում մրցակցի հարկի 2։1 հաշվով առավելության հասավ Լատվիայի ընտրանու նկատմամբ։
Մինչև Լատվիայի հավաքականի հետ խաղը Հայաստանի հավաքականը յուրահատուկ հակառեկորդ ուներ։ Մեր ընտրանին նախորդ 26 խաղերում չեր կարողացել անառիկ պահել սեփական դարպասը։ Այս խաղում սեփական դարպասը անառիկ պահելու դեպքում մերոնք պահպանում էին իրենց տեղը Ազգերի լիգայի С խմբում։
Առաջին խաղակեսում փոփոխական հաջողությամբ էր խաղը ընթանում, ու հիմնականում հավասար պայքար էր։ Բայց Նաիր Տիկնիզյանը 31-րդ րոպեին շատ լավ հնարավորություն ուներ հաշիվը բացելու, սակայն շեղ հարվածեց։ Առաջին կեսի վերջնամասում մեր թիմը մի քանի անգամ իրար հետևից սպառնաց դաշտի տերերի դարպասին, բայց գրոհի եզրափակումը չէր ստացվում։ Ի վերջո թիմերը գնացին ընդմիջման առանց գոլային իրական պահ ստեղծելու։
Երկրորդ խաղակեսի մեկնարկում մեր հավաքականը վերջապես հասավ իր նպատակին։ Նախ Ռանոսի հարվածից հետո լատվիացիներին փրկեց դարպասապահ Ռիխարդ Մատրեվիցսը, ապա Լուկաս Սելարայանի փոխանցումից հետո Էդուարդ Սպերցյանը գլխի հարվածով առաջ մղեց մեր թիմին։ Դաշտի տերերը հաշիվը հավասարեցնելու հիանալի շանս ունեին երկրորդ կեսի միջնամասում, բայց Օգնեն Չանչարևիչը փրկեց մեր թիմին։ Երկու րոպե անց, սակայն, Լատվիան այնուամենայնիվ խփեց պատասխան գնդակը։
Սակայն մերոնք շատ արագ նորից առաջ անցան հաշվի մեջ։ Սելարայանի հարվածից հետո գնդակը դիպավ դարպասի հորիզոնական ձողին, իսկ վրա հասած Արթուր Միրանյանը այն ուղարկեց դարպասային գծից ներս։ Հաղթական հաշիվը մերոնք պահպանեցին, ու երեք միավոր վաստակելով խմբում զբաղեցրին երկրորդ տեղը։ Հայ ֆուտբոլիստները B լիգա անցնելու համար կմասնակցեն անցումային խաղերին։
Լատվիա-Հայաստան խաղին զուգահեռաբար ընթանում էր նաև մեր խմբի մյուս հանդիպումը Հյուսիսային Մակեդոնիայի և Ֆարերյան կղզիների հավաքականների միջև։ Հյուսիսային Մակեդոնիայի հավաքականը հաղթեց 1։0 հաշվով ու տեղափոխվեց B լիգա։
Աղբյուրը՝ Sputnik Armenia
