Աբխազիայի նախագահ Ասլան Բժանիան դուրս է եկել իր կողմնակիցների մոտ և հայտարարել, որ կմնա իր պաշտոնում։
«Հանրապետության նախագահը, վարչապետը, նախարարությունների և գերատեսչությունների ղեկավարները մնում են իրենց տեղերում և կշարունակեն աշխատել։ Խնդրում եմ, մի տրվեք սադրանքներին, ես կմնամ Աբխազիայում և կաշխատեմ նախկինի պես»,- ասել է Բժանիան։
Բժանիան նաև նշել է, որ ներկայումս բանակցություններ են ընթանում ընդդիմության հետ և շնորհակալություն է հայտնել «բոլոր քաղաքացիական անձանց և համազգեստով մարդկանց» աջակցության համար։
Ուրբաթ օրը աբխազական ընդդիմությունը գրավել է Աբխազիայում կառավարական շենքերի համալիրը և պահանջել հանրապետության նախագահ Ասլան Բժանիայի հրաժարականը, որը բանակցողների հետ հանդիպումից հետո ժամանակ է պահանջել մտածելու համար։
Ընդդիմությունը նաև ստեղծել է համակարգող խորհուրդ՝ քաղաքական ճգնաժամը լուծելու և հանրապետության իշխանությունների հետ բանակցելու համար։Երեկոյան կառավարական շենքերի համալիրը գրաված ընդդիմադիրները արդեն ապամոնտաժել են նախագահ Բժանիայի անուն-ազգանունով ցուցանակը նրա աշխատասենյակի դռան վրայից։
