Աշխարհի լավագույն ջութակահարներից մեկը՝ Արա Մալիկյանը, իր երևանյան համերգը, որը կայանալու է հունիսի 3-ին Կարեն Դեմիրճյանի անվան մարզահամերգային համալիրում, նվիրում է Կոմիտասի 155-ամյակին:
«Արմենպրես»-ի հաղորդմամբ՝ արտիստը համերգից առաջ այցելեց Կոմիտասի թանգարան-ինստիտուտ, շրջեց թանգարանում, ծանոթացավ ցուցանմուշներին և խոստովանեց՝ կարծում էր՝ բավականին լավ գիտի Կոմիտասի թե՛ կենսագրությունը, թե՛ երաժշտությունը, սակայն պարզվեց՝ դեռ շատ բան կա, որ պետք է իմանալ:Մալիկյանը ծնվել է Լիբանանում, սակայն ավելի քան քսան տարի ապրում և ստեղծագործում է Իսպանիայում, պարբերաբար գալիս է հայրենիք, բայց առաջին անգամ էր Վարդապետի թանգարան-ինստիտուտում:«Շատ հուզված եմ. այստեղ հայրենանվեր գործ են անում, ինչը ոգևորիչ է: Շատ հաճախ եմ կատարում Կոմիտասի ստեղծագործությունները: Երևանյան համերգի ծրագրում Կոմիտաս նախատեսված չէր, բայց այս այցից հետո չեմ կարող չնվագել»,-նշեց ջութակահարը:
Նրա խոսքով՝ Կոմիտասը շատ է ճամփորդել, սակայն նրա երաժշտությունը շատ հայկական է, շատ ժողովրդական է: «Կոմիտասը խելացի հորինող է եղել ու կարողացել է իր երաժշտությամբ նվաճել աշխարհը: Ուր էլ լինեմ՝ Եվրոպայում, Ամերիկայում, լատինական երկրներում, երբ Կոմիտաս եմ կատարում, զգում եմ՝ այն հասնում է հանդիսատեսի սրտին»,-նշեց Մալիկյանն ու հավելեց՝ իր երևանյան համերգը նվիրում է Վարդապետի 155-ամյակին:Մալիկյանն առաջին անգամ երևանյան բեմում ելույթ է ունեցել 2023-ի հոկտեմբերին՝ անմոռանալի հույզեր պարգևելով հանդիսատեսին:Ավելի վաղ խոսելով The Ara Malikian World Tour-ի մասին, որի շրջանակում իրականացվում է երևանյան համերգը՝ ջութակահարը նշել է. «Երբ տեսա, թե ինչպես է որդիս ամիսներ շարունակ տևած անկումներից, անհաջող փորձերից և ճիգերից հետո իր առաջին քայլերն անում, հասկացա, որ բոլորս էլ ժամանակին ունեցել ենք այդ ուժը, որ հետզհետե մոռացվել է։ Երեխաները քնքուշ են, չեն վախենում սխալվելուց, ազատ են ու արտահայտվող: Երբ նայում ես մանկանը, հասկանում ես՝ ով ես եղել, թե որքան երկար ժամանակ է, որ քեզ զրկել ես այդպիսին լինելուց։ Այս շրջագայությունը ծնվել է իմ դիտարկումների արդյունքում, երբ հետևել եմ, թե ինչպես է մեծանում իմ որդին, ինչպես եմ հասակ առնում նրա հետ։ Այստեղ այն հնչյուններն ու մեղեդիներն են, որ արտահայտում են իմ զգացողությունները և զավակիս միջոցով ոգեշնչել են ինձ: Շրջագայությունը լի է դինոզավրերով, ռոբոտ-կաղամարներով, ժամանակի մեքենաներով, թռչող դաշնամուրներով և երկլեզու միմոսներով։ Սա այն ալբոմն է, որը մոռացության էի մատնել, բայց որը հզոր ներգործություն ունի։ Զարմանահրաշ է յուրաքանչյուր օր բացահայտել դրանց հմայքն ու գրավչությունը»:
Մալիկյանի հետ բեմում կլինեն երաժիշտներ, որոնց հետ ջութակահարը երկար ճանապարհ է անցել, հանդես եկել աշխարհի հեղինակավոր բեմերում: Նրանք են դաշնակահար Իվան «Մելոն» Լյուիսը, կոնտրաբասահար Իվան Ռուիս Մաչադոն, թմբկահար Գեորվիս Պիկո Միլանը, կիթառահար Դայան Աբադը:Հայաստանից հետո Մալիկյանը վերադառնալու է Իսպանիա, այնուհետև շրջագայությունը շարունակելու է Պորտուգալիայում, Արգենտինայում, Չիլիում, Բրազիլիայում, Մեքսիկայում:Արա Մալիկյանը ծնվել է Լիբանանում, սակայն երկար տարիներ ապրում և ստեղծագործում է Իսպանիայում: Նրա տաղանդը բացահայտվել է վաղ տարիքում՝ չնայած այն հանգամանքին, որ Լիբանանի քաղաքացիական պատերազմի ընթացքում երկար ժամանակ ստիպված է եղել ապրել և սովորել ռմբապաստարաններում։ Մալիկյանի առաջին մեծ համերգը կայացել է 12 տարեկանում, իսկ երկու տարի անց՝ դիրիժոր Հանս Հերբերտ Յորիսի միջնորդությամբ, գերմանական կառավարության կողմից կրթաթոշակ է ստացել՝ Հանովերի երաժշտության և թատրոնի բարձրագույն դպրոցում սովորելու համար։ Մալիկյանը շարունակել է իր կրթությունը Լոնդոնի Գիլդհոլի երաժշտության և դրամայի դպրոցում, ինչպես նաև դասեր առել աշխարհահռչակ պրոֆեսորներից։ 2015-ին Մադրիդի Թագավորական թատրոնի հետ համագործակցությամբ վերաթողարկել է իր ալբոմը՝ նվիրված Իսպանիայում բնակություն հաստատելու 15-ամյակին։Մալիկյանի վերջին տարիների խոշոր շրջագայություններից է «15»-ը, որը հանրության և քննադատների շրջանում մեծ հաջողություն է ունեցել՝ ավելի քան 175 հազար հանդիսական և ավելի քան 150 համերգ։
