Շվեդ բնապահպան ակտիվիստ Գրետա Թունբերգը ժամանել է Հայաստան՝ բոյկոտելու Բաքվում անցկացվող COP29-ը, այս մասին ֆեյսբուքյան իր էջում տեղեկացրել է Կլիմայական արդարության հայկական նախաձեռնությունը։
«Ուրախ ենք տեղեկացնել, որ Գրետա Թունբերգը` բնապահպանական ակտիվության աշխարհի առաջատար ձայներից մեկը, ժամանել է Հայաստան: Այսօր Կլիմայական արդարության հայկական նախաձեռնության անդամները և բնապահպան ակտիվիստները ջերմորեն ողջունեցին Գրետային:
Նրանք միասին այցելեցին Հաղպատի հինավուրց վանքը, որն արժեքավոր հայկական ժառանգություն է՝ նրա հետ մեր հարուստ մշակույթի մի մասնիկը կիսելու համար: Գրետան բոյկոտում է COP29-ը՝ Ադրբեջանում անցկացվելու պատճառով։ Փոխարենը նա որոշել է համերաշխությունը հայտնել Հայաստանին»,- ասված է հաղորդագրության մեջ։
Հիշեցնենք, որ ավելի վաղ Գրետան վրացական լրատվամիջոցներին հայտնել էր, որ Վրաստանից հետո ժամանելու է Հայաստան բնապահպան ակտիվիստների հետ բողոքի ակցիա կազմակերպելու համար։ Նա նաև հայտարարել էր, որ չի մասնակցելու Բաքվում ընթացող ՄԱԿ-ի Կլիմայի փոփոխության COP29 համաժողովին։
Ակտիվիստի խոսքով՝ համաժողովը Բաքվում անցկացնելը «երեսպաշտություն» է և ՄԱԿ-ի կողմից կեղծավորության հերթական հերթական դրսևորում, քանի որ Ադրբեջանն ավտորիտար և նավթային երկրի է, որը հայերի նկատմամբ իրականացրել է էթնիկ զտումներ: «COP 29-ը անցկացնելու է մի երկիր, որն այդքան կախված է հանածո վառելիքից և ծրագրում է ընդլայնել հանածո վառելիքի արտադրությունը։ Դա ապտակ է բոլոր այն մարդկանց համար, որոնք տառապում են թե կլիմայի փոփոխությունից, թե ադրբեջանական ռեժիմից»,- հայտարարել էր Թունբերգը։
Հիշեցնենք, որ 2022թ․ դեկտեմբերին բնապահպան ներկայացող մի խումբ ադրբեջանցի ակտիվիստներ իբրև թե «բնապահպանական աղետը կանխելու» նպատակով փակել էին Արցախը Հայաստանին կապող միակ ճանապարհը՝ Լաչինի միջանցքը։
Մամուլում շրջանառվող տեղեկությունների համաձայն՝ ցուցարարների շարքում էր, օրինակ՝ ադրբեջանցի նախկին զինվորական, իշխանամետ մամուլում որպես ռազմական փորձագետ ներկայացող Թելման Գասիմովը:
Ըստ տեղեկությունների՝ նա պահեստազորի կապիտան է, խոսում է հայերեն։ Նրանց շարքում էր նաև Ռամիլ Սաֆարովը, որը Հունգարիայում հայ զինվորականի էր կացնահարել։
Տասնյակ ցուցարարների շարքում կային զինվորականներ, հրապարակված տեսանյութերում երևացել էր նաև թուրքական ազգայնական «Գորշ գայլեր» կազմակերպության նշանը, որը եվրոպական մի շարք երկրներում արգելված է։
