Ուկրաինայի արտաքին գործերի նախարար Անդրեյ Սիբիգան արձագանքել է ԱՄՆ նախագահ Դոնալդ Թրամփի՝ Ուկրաինայի ղեկավարությունը փոխելու անհրաժեշտության մասին հայտարարությանը՝ ընդգծելով, որ երկրի նախագահին ընտրելու իրավունքը պատկանում է բացառապես ուկրաինացի ժողովրդին։
«Նախագահ Զելենսկին ղեկավարում է մեր երկիրը պատերազմի ժամանակ՝ հանուն անկախության, ազատության և արժանապատվության։ Նա վայելում է ուկրաինացի ժողովրդի աջակցությունը, և հենց ժողովուրդն ունի որոշելու իրավունքը։ Արտերկրից հնչող հայտարարությունները միայն հաստատում են, որ նա լավ է կատարում իր աշխատանքը։ Նա արժանի է աջակցության», — X սոցիալական ցանցում գրել է Սիբիգան։
Ուկրաինայի ԱԳ նախարարի հայտարարությունը հաջորդել է հոկտեմբերի 10-ին Թրամփի հնչեցրած քննադատությանը։
ԱՄՆ նախագահը Սպիտակ տանը լրագրողների հետ զրույցում հայտարարել էր, որ Ուկրաինային նոր առաջնորդ է անհրաժեշտ, որը կկարողանա Ռուսաստանի հետ համաձայնության հասնել պատերազմի դադարեցման շուրջ։
«Ես առաջարկում եմ նրանց գտնել նոր առաջնորդ, որը կկարողանա գործարք կնքել, որովհետև նա կարող էր բազմաթիվ գործարքներ կնքել, բայց ինչ-ինչ պատճառներով դա երբեք չի անում», — ասել էր Թրամփը։
Ամերիկացի նախագահը նաև մեղադրել էր Զելենսկուն ռուսական նավթավերամշակման գործարաններին ուկրաինական հարվածների համար՝ պնդելով, որ դրանք նպաստում են ԱՄՆ-ում դիզելային վառելիքի գների հետ կապված իրավիճակի սրմանը։
Թրամփի կարծիքով՝ Կիևը պետք է դադարեցնի ռուսական էներգետիկ ենթակառուցվածքների դեմ հարձակումները։
Հայտարարությունները հնչել են Վաշինգտոնի և Կիևի միջև ռուսական դիզելային վառելիքի մատակարարումների վերաբերյալ ԱՄՆ-ի և Ռուսաստանի պայմանավորվածության շուրջ տարաձայնությունների ֆոնին։
Զելենսկին այդ պայմանավորվածությունն անվանել է «նվեր Պուտինին»՝ հայտարարելով, որ ռուսական նավթամթերքների նկատմամբ սահմանափակումների թուլացումը Մոսկվային լրացուցիչ ֆինանսական հնարավորություններ կտա Ուկրաինայի դեմ պատերազմը շարունակելու համար։
Ուկրաինայի նախագահի գնահատմամբ՝ Ռուսաստանը ճնշման թուլացումն ընկալում է որպես ռազմական գործողությունները շարունակելու և ուկրաինական քաղաքներին նոր հարվածներ հասցնելու հնարավորություն։
