Բարսելոնան և նրա շրջակայքը առնվազն վերջին 20 տարվա ամենաանձրևոտ օրն են ապրել, հաղորդում է EFE-ն։
Կատալոնիային պատուհասած հորդառատ անձրևները հանգեցրել են տեղումների ռեկորդային քանակի և բազմաթիվ ջրածածկումների պատճառ դարձել։
Կատալոնիայի օդերևութաբանական ծառայության (Meteocat) տվյալներով, Բարսելոնայի Ռավալ շրջանում տեղատարափի ընթացքում տեղացել է մոտ 190 մմ տեղում։ Diagonal-ի Zona Universitària կայանում գրանցվել է ավելի քան 170 մմ, իսկ Բադալոնայի թանգարանի մոտ՝ 152 մմ։ Բարսելոնայի շրջակայքում ցուցանիշներն էլ ավելի բարձր են եղել. Կաբրիլսում տեղացել է 226,6 մմ, Գրանոլյերսում՝ 224,3 մմ, Մատարոյում՝ 220,1 մմ։
Ռավալում մեկ րոպեում տեղացել է 3,4 մմ անձրև, իսկ կես ժամում՝ 36,1 մմ։ Օրական ցուցանիշը գրեթե կրկնակի գերազանցել է այստեղ նախկինում գրանցված առավելագույնը, որը արձանագրվել էր 2017 թվականի մարտի 24-ին։
Ուժեղ անձրևները կապված են մեզոսանդղակի կոնվեկտիվ համակարգի հետ, որը ձևավորվել է Միջերկրական ծովի վրա։ Meteocat-ի կանխատեսմամբ, տեղումները շարունակվել են նաև կիրակի և տեղ-տեղ մնացել են ուժեղ ու հորդառատ։ Ծառայությունը նախազգուշացրել է, որ տեղումների կուտակումը բացառիկ է լինելու թե՛ տեղացած ջրի քանակով, թե՛ ընդգրկված տարածքով։
Անբարենպաստ եղանակի պատճառով Կատալոնիայում բազմաթիվ ջրածածկումներ են առաջացել։ Կիրակի առավոտվա դրությամբ հրշեջները ստացել էին հարյուրավոր հաղորդումներ միջադեպերի մասին, հիմնականում՝ ջրի հետ կապված։ Տարածաշրջանում պահպանվել է նաև գետերի ափերից դուրս գալու վտանգը. իշխանությունները բնակիչներին կոչ են արել պահպանել տեղաշարժի սահմանափակումները և հնարավորության դեպքում մնալ տանը։
Ռավալում Meteocat-ի կայանը գործում է 2006 թվականի հոկտեմբերից, ուստի արձանագրված ցուցանիշը հնարավորություն է տալիս ներկայիս դրվագը համեմատել առնվազն երկու տասնամյակի դիտարկումների հետ։
