Այսօր անմահ հերոս, սպա Ռոլանդ Սարգսյանի ծննդյան օրն է:
Շնորհավոր ծնունդդ, հզո՛ր հրամանատար։
Փա՛ռք և խոնարհում։
Ավագ ենթասպա Ռոլանդ Գնելի Սարգսյանը ծնվել է 1981 թվականի սեպտեմբերի 25-ին Երևանում։ 1988-1998 թվականներին սովորել է Պեյո Յավորովի անվան թիվ 131 դպրոցում։
1999 թվականի նոյեմբերի 24-ին զորակոչվել է ՀՀ զինված ուժեր։ Սկզբնական ծառայությունն անցկացրել է Եղվարդի 45/077 զորամասում, ապա՝ 2000 թվականի մայիսի 11-ից, ծառայությունը շարունակել Արցախի Հանրապետության Մեխակավանի 54/122 զորամասում։
2004 թվականին ծառայության է անցել ՀՀ ՊՆ 20440 զորամասում՝ ռազմական ոստիկանությունում։ 2010 թվականին նշանակվել է նույն զորամասի հատուկ նշանակության վաշտի հատուկ նշանակության դասակի հրամանատարի տեղակալ։
2016 թվականի ապրիլին հատուկ ջոկատայինների խմբի կազմում գործուղվել է Արցախի Հանրապետության պաշտպանության բանակ՝ Քառօրյա պատերազմի ընթացքում ծառայողական առաջադրանքներ իրականացնելու նպատակով։
2020 թվականի սեպտեմբերի 28-ից մասնակցել է Արցախյան 44-օրյա պատերազմին։ Եղել է Խոջալուի տանկային 46994 զորամասի 3-րդ գումարտակի 8-րդ հրաձգային վաշտի ապահովման ջոկի հրամանատար։
Ռազմական տարբեր գործողությունների մասնակցած Ռոլանդ Սարգսյանը նոյեմբերի 6-ին տեղափոխվել է Շուշի և մասնակցել քաղաքի համար մղվող մարտերին։ Ձեռքի ծանր վիրավորում ստանալուց հետո էլ, չնայած դրան, շարունակել է մարտը՝ առաջ շարժվելով։ Ռազմական գործողությունների ընթացքում նա հերոսաբար զոհվել է։
Ազգի արժանավոր զավա՛կ, սխրանքդ անմահ է։
Թող քո հերոսությունն ու նվիրումը հայրենասիրության և ուժի օրինակ դառնան որդուդ և գալիք սերունդների համար։
Փա՛ռք ու խոնարհում քո հիշատակին։
