«Հրապարակ»-ը գրում է.
Սպիտակի համայնքապետ Քաջայր Նիկողոսյանը, որն ինքն իրեն 90 հազար դրամով պարգեւատրել էր, հետո գումարը հետ վերադարձրել բյուջե, շարունակում է արտառոց որոշումներ կայացրել: Համայնքապետարանի պաշտոնական էջից տեղեկացանք, որ նա համայնքի բյուջեից 2 հազար դրամ է դուրս գրել, դրանով ծաղիկ է գնել եւ 1804 թ. օգոստոսի 21-ի ռուս-պարսկական ճակատամարտում զոհված հայ եւ ռուս զինվորների հիշատակը հավերժացնող հուշարձանին է խոնարհել:
Համայնքապետի մեկ այլ որոշման մեջ կարդում ենք. «Շիրակամուտի երաժշտական դպրոց» համայնքային ոչ առեւտրային կազմակերպության տնօրեն Հրանուշ Շիրակի Իվանյանի հետ 2021 թ. հոկտեմբերի 25-ին կնքված աշխատանքային պայմանագրի 7.1-ին կետում եւ Շիրակամուտ համայնքի ղեկավարի 2021 թ. հոկտեմբերի 25-ի թիվ 54-Ա որոշման 1-ին կետում նշված պաշտոնավարման ժամկետը երկարաձգել հինգ տարի ժամկետով՝ մինչեւ 2036 թվականի հոկտեմբերի 25-ը»։
Ըստ համայնքապետի՝ 2026 թվականից 5 տարով տնօրենի պաշտոնը երկարաձգելու դեպքում նա կպաշտոնավարի մինչեւ 2036 թվականը:Ի դեպ, այս «գրագետ» համայնքապետը պատրաստվում է առաջիկա ընտրություններին, որը կայանալու է նոյեմբերի 29-ին, ՔՊ-ն պատրաստվում է կրկին նրա թեկնածությունն առաջադրել:ՀԳ Մեր զանգից հետո միայն 2036 թվականը կայքում դարձավ 2031 թվական:
