Միլանի «Ինտերի» հայ կիսապաշտպան Հենրիխ Մխիթարյանը 2026/27 մրցաշրջանից առաջ հարցազրույց է տվել իտալական La Gazzetta dello Sport պարբերականին:
Անդրադառնալով պայմանագրի երկարաձգմանն ու խաղաժամանակի երաշխիքներին՝ նա նշել է. «Ես ոչ մի երաշխիք չեմ ստացել. դա նույնիսկ արդարացի չէր լինի, քանի որ ես ինքս պետք է խաղադաշտում ապացուցեմ՝ արժանի եմ տեղ ունենալ թիմում, թե ոչ: Բայց զգում եմ, որ կարող եմ ևս մեկ տարի բարձր մակարդակով խաղալ, ուստի ակումբի հետ միասին որոշեցինք մնալ ևս մեկ տարի: Հետո կտեսնենք»:
Խոսելով նոր մրցաշրջանում իր դերի մասին՝ Մխիթարյանն ընդգծել է. «Դերը սովորականն է։ Ես միշտ մարզվել եմ առավելագույնս, որպեսզի օրինակ ծառայեմ մյուսներին, հատկապես՝ երիտասարդներին»:
Պատասխանելով հարցին, թե արդյոք սա իր կարիերայի վերջին տարին է, ֆուտբոլիստը հայտնել է. «Չգիտեմ (ծիծաղում է)։ Այսօր անհնար է դա որոշել: Պետք է հասկանամ, թե ինչպես ինձ կզգամ այս մրցաշրջանի ավարտին: Իմ տարիքում իմաստ չունի երկարաժամկետ ծրագրեր կազմել»:
Հայաստանի հավաքականի նախկին ավագը նախորդ ամիս երկարաձգեց «Ինտերի» հետ պայմանագիրը մինչև 2027 թվականի ամառ:
