Իրանական առևտրային նավին Ուկրաինայի հասցրած հարվածը կանխամտածված է եղել, և Իրանը միջոցներ կձեռնարկի Ուկրաինային պատասխանատվության ենթարկելու համար:
Առկա ապացույցները փաստում են, որ ուկրաինական կողմի հարվածն իրանական առևտրային նավին կանխամտածված բնույթ է կրել։ Իրանը դիմելու է բոլոր անհրաժեշտ քայլերին՝ Ուկրաինային պատասխանատվության ենթարկելու նպատակով։ Այս մասին հայտնել է Իրանի արտաքին գործերի նախարարության պաշտոնական ներկայացուցիչ Իսմայիլ Բաղային։
«Ուկրաինայի իշխանությունները՝ ինչպես Իրանի արտգործնախարարի հետ ուղիղ զրույցի ընթացքում, այնպես էլ մեզ ուղարկված հաղորդագրություններում, պնդում էին, թե հարվածը կանխամտածված չի եղել։ Սակայն առկա փաստերը և համոզիչ ապացույցները, ներառյալ Ուկրաինայի նախագահի ուղիղ հայտարարությունները, վկայում են այն մասին, որ հարձակումը կանխամտածված է եղել։ Մենք ի գիտություն ենք ընդունել ուկրաինական կողմի բացատրությունները և սպասում ենք՝ արդյոք դրանց կհետևե՞ն գործնական քայլեր, որոնք կհաստատեն այս հանցագործության ոչ դիտավորյալ բնույթի մասին իրենց պնդումները։
Իրանն, անշուշտ, կձեռնարկի բոլոր անհրաժեշտ միջոցները Ուկրաինային պատասխանատվության ենթարկելու համար, որպեսզի Ուկրաինայի կողմից նման գործողություններն ու հանցագործություններն այլևս երբեք չկրկնվեն»,- նշել է Բաղային։
