Համահայկական Ճակատ Շարժման առաջնորրդ, Գեներալ-մայոր Արշակ Կարապետյանը բաց նամակով դիմել է Նիկոլ Փաշինյանին, որում ասված է.
«Սույն թվականի հոկտեմբերի 24-ին ՀՃՇ-ի և անհետ կորածների, բռնի առևանգվածների ու գերիների ընտանիքների անունից կառավարությանն է հանձնվել նամակ Նիկոլ Փաշինյանի անունով։ Նամակը մուտքագրվել է ֆիզիկական անձ Ռուզաննա Ստեփանյանի անունից։
Տեղեկացնում ենք ձեզ , որ Ռուզաննա Ստեփանյանը ՀՃՇ անդամ է։Նամակին առարկայական պատասխանելու փոխարեն մենք գրություն ենք ստացել այն մասին, որ այն վերահասցեագրվել է ԱԳՆ-ին և ԱԱԾ-ին, որոնք մատնված են անգործության, և որևէ հասցեական գործունեություն չեն ծավալում այդ խնդրի լուծման ուղղությամբ, որի ամենամեծ ապացույցը արդյունքների բացակայությունն է:
Համահայկական Ճակատ Շարժումը բավարարված չլինելով ինչպես կառավարության, այնպես էլ նրա առանձին ստորաբաժանումների գործունեությունից, կրկին ձեզ է հասցեագրում մի քանի պահանջներ, որոնք դուք՝ որպես Հայաստանի Հանրապետության կառավարության ղեկավար պարտավոր եք իրականացնել՝ պաշտպանելու ձեր իսկ գործունեության հետևանքով գերության և պատանդառության մեջ գտնվող անձնաց օրինական իրավունքնեորի պաշտպանության համար:Եվ այսպես․
1․ Ինչո՞ւ Հայաստանի Հանրապետությունը կոնկրետ և հրապարակային քայլեր չի ձեռնարկում միջազգային հարթակներում՝ գերիների, անհետ կորածների, բռնի առևանգվածների հարցը բարձրացնելու և նրանց վերադարձի հարցը լուծելու ուղղությամբ․
2. Ինչո՞ւ Հայաստանի Հանրապետությունը պաշտոնական բանակցություններ չի վարում Ադրբեջանի իշխանությունների հետ գերիների, անհետ կորածների, բռնի առևանգվածների հարցը լուծելու համար: Այն բացատրությունը, թե այդ բանակցությունները վարվում են գաղտնիության պայմաններում, և դրանց ընթացքը հրապարակման ենթակա չէ, կարող է համոզիչ լինել, եթե դրանք արդյունք ունենային, մինչդեռ հիմա արդեն պարզ է, որ դա հարցը քնեցնելու պարզագույն հնարք է:
3. Ինչպե՞ս եք վերաբերվում Բաքվի բանտերում գտնվող հայ գերիներին և բռնի առևանգվածներին: Մեզ մոտ այնպիսի տպավորություն է, որ անձամբ դուք և ձեր իշխանությունը ոչ միայն շահագրգռված չեք այդ անձնաց ազատ արձակման հարցում, այլ ընդհակառակը, ի դեմս նրանց, տեսնում եք հնարավոր քաղաքական մրացկիցների, և նույնիսկ հակառակորդների, ովքեր կարող են ազատության պայմաններում բացահայտել ձեր իշխանության հակազգային դիմագիծը:
Որոշ հիմնավոր կասկածները փարատելու համար գուցե ասեք, թե 2023 թվականի դեկտեմբերի 13-ից հետո կոնկրետ ինչ եք արել գերիներին վերադարձնելու համար.
4. ՄԱԿ գագաթաժողովների ժամանակ և ՄԱԿ գլխավոր քարտուղարի հետ հանդիպումներում արդյո՞ք քննարկել եք գերիների, անհետ կորածների, բռնի առևանգվածների հարցը:
5․ Եվրոպական միության, ԵԱՀԿ-ի և այլ միջազգային կառույցների հետ ի՞նչ քայլեր եք ձեռնարկել՝ օգտագործելու նրանց միջնորդական հնարավորությունները վերոնշյալ խնդիրների լուծման համար:
6․ Միջազգային դատարաններում ի՞նչ հայցեր են ներկայացվել գերիների, անհետ կորածների, բռնի առևանգվածների վերաբերյալ:
7. Ո՞ր միջազգային կառույցներին եք դիմելու լրացուցիչ աջակցության համար:
Ակնկալում ենք հանգամանալի և մանրակրկիտ պատասխան սահմանված կարգով Ձեր անունից՝ ինչպես շահագրգիռ կողմերի, այնպես էլ հասարակության շրջանում լիարժեք տեղեկացվածությունն ապահովելու համար»։
