Լեհաստանն ու Ուկրաինան առաջընթաց են արձանագրել համաձայնագրի իրագործման հարցում, ըստ որի Վարշավան պետք է Կիևին փոխանցի ՄիԳ-29 կործանիչներ, իսկ Ուկրաինան Լեհաստանին տրամադրի տեխնոլոգիաներ և անօդաչու թռչող սարքեր, հայտնել է Լեհաստանի պաշտպանության նախարար Վլադիսլավ Կոսինյակ-Կամիշը, տեղեկացնում է Polsat News-ը։
Ըստ նախարարի, ուկրաինական կողմը վերադարձել է բանակցություններին, և այժմ իրավիճակը զգալիորեն ավելի լավ է թվում, քան մի քանի օր առաջ։ Միաժամանակ լեհ նախարարը ընդգծել է, որ գործարքը պետք է հիմնված լինի փոխադարձության և իրական համերաշխության սկզբունքի վրա։
«Ուկրաինան մեծ հնարավորություններ ունի դրոնների արտադրության ոլորտում և նույնիսկ արտահանում է դրանք Մերձավոր Արևելք, ուստի չի կարելի ասել, որ նրա ողջ արտադրանքը օգտագործվում է բացառապես սեփական կարիքների համար», — հայտարարել է Կոսինյակ-Կամիշը։
Լեհաստանի պաշտպանության նախարարության ղեկավարը նաև մեկնաբանել է լեհական ՄիԳ-29-երի տեխնիկական վիճակի վերաբերյալ Կիևի հնարավոր պահանջների մասին հաղորդումները։ Նա նշել է, որ Վարշավան պատրաստ է քննարկել ինքնաթիռների արդիականացումը, սակայն հնարավոր ծախսերը պետք է իր վրա վերցնեն Ուկրաինան կամ այն դաշնակիցները, որոնք կցանկանան մասնակցել ֆինանսավորմանը։
Ավելի վաղ Կոսինյակ-Կամիշը հայտարարել էր, որ Լեհաստանը Ուկրաինային կործանիչներ չի փոխանցում, քանի որ Կիևը, ենթադրաբար, չի կատարել պայմանավորվածության իր մասը։ Ըստ նրա, նախնական առաջարկը «ՄիԳ-եր՝ դրոնների դիմաց» փոխանակումն էր․ Ուկրաինան պետք է կիսվեր անօդաչու տեխնոլոգիաներով և դրանց արտադրության փորձով՝ ինքնաթիռների դիմաց։
Լեհաստանի պաշտպանության նախարարը նշել է, որ անօդաչուների ոլորտում ուկրաինական մշակումներն ունեն բարձր արժեք, քանի որ խոսքը ոչ միայն տեխնիկայի մատակարարումների, այլև տեխնոլոգիաների և փորձի փոխանակման մասին է։ Նա հավելել է, որ պայմանավորվածությունը կարող է ձեռք բերվել, եթե պահպանվի փոխադարձության սկզբունքը։
