Ատոմային էներգիայի միջազգային գործակալության (ՄԱԳԱՏԷ) ղեկավար Ռաֆայել Գրոսսին հայտնել է, որ առաջիկայում կլինի Թեհրանում, որտեղ ծրագրում է իշխանությունների հետ քննարկել Իրանի միջուկային ծրագիրը:
«Առաջիկա օրերին ես կլինեմ Թեհրանում, որտեղ ծրագրված են բանակցություններ ղեկավարության հետ՝ բացատրելու ծրագրի ոչ լիովին պարզ ասպեկտները՝ ինչպես անցյալում, այնպես էլ ներկա փուլում», - ասել է նա La Stampa -ին տված հարցազրույցում։
«Ես դեռ չգիտեմ Թեհրանի դիրքորոշումը, այդ իսկ պատճառով ինձ համար այդքան կարևոր են այս հանդիպումները», - ասել է Գրոսսին։
Նա հիշեցրել է, որ վերջին անգամ Իրանում է եղել մայիսի սկզբին, երբ վերսկսել է շփումները նախագահ Էբրահիմ Ռաիսիի և արտաքին գործերի նախարար Ամիր Աբդոլլահիանի հետ։ Իր ընթացիկ այցի ընթացքում նա հույս ունի հանդիպել նախագահ Մասուդ Փեզեշքիանի հետ։
Գրոսսին նաև նշել է, որ անհրաժեշտ է հասկանալ ԱՄՆ հանրապետական վարչակազմի մոտեցումը, որը «միշտ տարբերվել է Ջո Բայդենի կառավարության մոտեցումներից»։
