Իրանը առաջարկել է բացել Հորմուզի նեղուցը Միացյալ Նահանգների համար՝ Վաշինգտոնի կողմից փոխհատուցման դիմաց, հաղորդում է Սաուդյան Արաբիայի Al Arabiya հեռուստաալիքը՝ հղում անելով դիվանագիտական աղբյուրներին։
«Իրանը առաջարկել է բացել Հորմուզի նեղուցը՝ Միացյալ Նահանգների կողմից փոխհատուցման դիմաց», – պնդում են հեռուստաալիքի աղբյուրները։ Նրանց խոսքով՝ Իրանը երկու առաջարկ է փոխանցել Պակիստանին, որը միջնորդում է Միացյալ Նահանգների հետ անուղղակի բանակցություններում։ Իրանի իշխանությունները նաև առաջարկել են «քննարկել պատժամիջոցների և սառեցված ակտիվների գործը նախքան որևէ համաձայնագիր ստորագրելը»։
Ավելի վաղ Իրանի արտաքին գործերի նախարարության խոսնակ Էսմայիլ Բաղային հայտարարել էր, որ միջուկային գործը և պատժամիջոցների վերացման հարցը չեն քննարկվի Միացյալ Նահանգների հետ բանակցությունների ներկայիս փուլում։ Նա հայտարարել էր, որ սահմանափակումների վերացման պահանջը Իրանի «անփոփոխ դիրքորոշումն» է և կքննարկվի «հաջորդ փուլերում»՝ համաձայնագրի վերջնական հաստատումից հետո։
