Իսրայելը և Միացյալ Նահանգները շարունակում են հարվածները Իրանի բնակավայրերին: ՑԱՀԱԼ-ը հայտարարել է Թեհրանում «լայնածավալ հարվածների ալիքի» մեկնարկի մասին՝ նշելով, որ հարվածել են այդ թվում՝ Իրանի կառավարական թաղամասին՝ նախագահական նստավայրին, Ազգային անվտանգության բարձրագույն խորհրդի շենքին, այլ կառույցների և ռազմական օբյեկտների։
Ատոմային էներգիայի միջազգային գործակալությունն էլ հաստատել է Իրանի Նաթանզի միջուկային օբյեկտին հարվածները, որը մեծապես ավերվել էր անցած տարվա 12-օրյա պատերազմի ժամանակ։ Գործակալությունը վերլուծել է արբանյակային պատկերները և պարզել, որ վնասվել են ուրանի հարստացման գործարանի ստորգետնյա մուտքի մոտ գտնվող շենքերը։ ԱԷՄԳ-ի գնահատմամբ՝ ճառագայթման սպառնալիք չկա:
Կարմիր մահիկի տվյալով՝ ԱՄՆ-ի և Իսրայելի հարվածների հետևանքով Իրանում զոհերի թիվն արդեն գերազանցում է 780-ը, որից 176-ը՝ երեխաներ։ Վիրավորների թիվը հասնում է 1000-ի: Ընդհանուր առմամբ ավերածություններ են գրանցվել Իսլամական Հանրապետության 153 բնակավայրում: Ամերիկացի զինվորականների շրջանում զոհերի թիվը հասել է 6-ի:
