Երեկվանից սկսած՝ հյուսիսից քամի է տարածաշրջան ներթափանցել, որի արդյունքում տեսանելիորեն մեր 181 տվիչները ցույց են տալիս, որ օդի որակի զգալի բարելավում է տեղի ունեցել: Զգալի է այնքանով, որ համադրելի է ամառվա ցուցանիշների հետ: Երեկ՝ առավոտյան, այն կազմում էր 29-30, այսօր PM 2-ի ցուցանիշը 65,8 է: Այդ մասին Երևանի քաղաքապետարանի գործակարգավարական խորհրդակցության ժամանակ ասաց Երևանի քաղաքապետարանի աշխատակազմի բնապահպանության վարչության պետի պաշտոնակատար Սիրարփի Հայկազյանը:«Միայն չենք բավարարվում նրանով, որ կա ցիկլոն կամ անտիցիկլոն, ավագանու նիստով ավագանու երկու որոշումների մեջ լրացուցիչ փոփոխություններ ենք ներկայացնելու՝ նվազեցնելու մարդածին աղբյուրներից արտանետումները:
Մեկը վերաբերել է ավագանու 405 Ն որոշմանը, և լրացուցիչ սահմանափակումներ են կիրառվելու շինհրապարակների նկատմամբ: Երկրորդը 48 Ն ավագանու որոշման մեջ լրացուցիչ փոփոխություններն են. դրանք պարտադիր բարեկարգման նորմերն են, որոնք կիրառելի ենք դարձնելու նաև հանքավայրերի վերաբերյալ»,- ասաց նա:
Երևանի քաղաքապետ Տիգրան Ավինյանն արձագանքեց՝ քաղաքում շինարարությունը չի կանգնեցվել, ավտոմեքենաների շահագործումը քաղաքում չի արգելվել, հազարավոր հեկտարներով նոր կանաչ տարածքներ չեն ստեղծվել, ապա եզրակացրեց.
«Սիրելի՛ երևանցիներ, իրականում օդի որակի խնդիրը Երևանում մեծապես պայմանավորված է օդի ինվերսիայով, բնակլիմայական պայմաններով և մեր աշխարհագրական դիրքով, բայց ինչպես տիկին Հայկազյանը ճիշտ նշում է, մենք ունենք որոշակի լծակներ՝ թեկուզ որոշ չափով ազդելու օդի որակի վրա, և այս առումով ամբողջապես այդ աշխատանքները, որոնք արվում են, որոշակի ազդեցություն թողնելու են:
Ինչ վերաբերում է գլոբալ փոփոխություններին, մենք պետք է շարունակաբար դիտարկենք մեծ ծավալով կանաչապատման աշխատանքները Երևան քաղաքից դուրս, թեկուզ որպեսզի կարողանանք որոշակի պատնեշ ստեղծել այն քամիների համար, որոնք բերում են այդ սմոգը, այդ օդը դեպի քաղաք:
Շատ դժվար բան եմ ասում, բայց կարծում եմ՝ իրագործելի բան է, և այդ ուղղությամբ պետք է աշխատենք»:
