ԱՄՆ կառավարության ներքին փաստաթղթերին հղում անելով՝ «Վաշինգտոն Փոստ»-ը պնդում է, որ Վենեսուելայի նախագահ Նիկոլաս Մադուրոն, ենթադրաբար, հոկտեմբերին ռազմական օգնություն է խնդրել Ռուսաստանից, Չինաստանից և Իրանից՝ ԱՄՆ-ի կողմից երկրին հարվածելու սպառնալիքների ֆոնին։
Հրատարակության տվյալներով՝ Մադուրոն խնդրել է հրթիռների, ռադարների և արդիականացված ինքնաթիռների մատակարարում՝ կապված Կարիբյան տարածաշրջանում ամերիկյան ուժերի կենտրոնացման հետ։
«Վաշինգտոն Փոստ»-ը պնդում է, որ Վենեսուելայի նախագահը նամակ է ուղարկել Ռուսաստանի ղեկավարներին, որում նաև խնդրել է Մոսկվային օգնել ամրապնդել իր երկրի օդային պաշտպանությունը, այդ թվում՝ վերականգնել Վենեսուելայի կողմից նախկինում ձեռք բերված մի քանի ռուսական կործանիչներ։
