Միացյալ Նահանգները հույս ունի Չինաստանի հետ երկարաժամկետ առևտրային համաձայնագրի հասնել, հայտարարել է ԱՄՆ նախագահ Դոնալդ Թրամփը։
«Չինաստանի հետ գործարքը հիանալի կլինի։ Այն երկար կտևի», - ասել է նա լրագրողներին իր ինքնաթիռում՝ Վաշինգտոնից դեպի Ֆլորիդա նահանգի Պալմ Բիչ թռչող ճանապարհին։ Ամերիկացի առաջնորդը շաբաթավերջին ուղևորվում էր Ֆլորիդայի իր Մար-ա-Լագո կալվածք։
«Ես շատ լավ հարաբերություններ ունեցա նախագահ Սի Ծինփինի հետ, ինչպես տեսաք», - ասել է Թրամփը՝ անդրադառնալով հոկտեմբերի 30-ին Կորեայի Հանրապետությունում Ասիա-խաղաղօվկիանոսյան տնտեսական համագործակցության գագաթնաժողովի շրջանակներում կայացած նրանց երկկողմ հանդիպմանը։
«Կարծում եմ՝ մենք երկար ժամանակ հիանալի հարաբերություններ կունենանք նրանց հետ», - հավելել է ԱՄՆ նախագահը։
Թրամփը պնդել է, որ ԱՄՆ-ից Չինաստան սոյայի մատակարարման հարցը շուտով կլուծվի՝ ամերիկյան գյուղատնտեսության շահերից ելնելով։
«Ես առաջարկում եմ, որ նրանք գնեն ավելի մեծ տրակտորներ և ավելի շատ հողատարածքներ», - նշել է նախագահը՝ նկատի ունենալով ամերիկացի ֆերմերներին և նրանց արտահանումը Չինաստան։
