ԱՄՆ-ում միջուկային փորձարկումների վերսկսումը, ենթադրաբար, կարող է նվազագույնի հասցնել միջուկային հակամարտության հավանականությունը։ Այս կարծիքը հայտնել է Պենտագոնի քարտուղար Փիթ Հեգսեթը՝ Կուալա Լումպուրում Հարավարևելյան Ասիայի երկրների ասոցիացիայի (ԱՍԵԱՆ) պաշտպանության նախարարների նիստից հետո կայացած մամուլի ասուլիսում։
Մեկնաբանելով ԱՄՆ նախագահ Դոնալդ Թրամփի՝ միջուկային զենքի փորձարկումները անհապաղ սկսելու հրամանը, նա ընդգծել է, որ գործակալությունը կհամագործակցի Էներգետիկայի նախարարության հետ, որը վերահսկում է երկրի միջուկային ռազմական համալիրը։
«Նախագահը հստակեցրել է, որ մենք պետք է ունենանք հուսալի միջուկային զսպման միջոց։ Սա զսպման հիմքն է։ Դա հասկանալը և միջուկային փորձարկումների վերսկսումը շատ պատասխանատու մոտեցում է։ Կարծում եմ՝ միջուկային հակամարտության հավանականությունը նվազում է, եթե գիտեք, թե ինչ [զինանոց] ունեք և վստահ եք, որ այն ճիշտ է գործում», - պնդել է նախարարը։
Պաշտպանության նախարարի խոսքով՝ Ամերիկայի «հզոր միջուկային զինանոցը» կօգնի Միացյալ Նահանգներին «ուժի միջոցով ապահովել խաղաղություն»։ «Մենք չենք ձգտում հակամարտության Չինաստանի կամ որևէ այլ երկրի հետ»։
«Բայց որքան մենք ուժեղ ենք, որքան մեր դաշինքներն ամուր են, որքան շատ ենք համագործակցում այս տարածաշրջանում և ամբողջ աշխարհում դաշնակիցների հետ, այնքան, իմ կարծիքով, միջուկային հակամարտության հավանականությունը նվազում է», - հավելել է Հեգսեթը։
